20.02.2026 | 11:15
Դպրոցի նկատմամբ հարուցվել և իրականացվել է վարչական վարույթ, տնօրենի տրվել է կարգադրագիր․ ՀՀ կրթության տեսչական մարմին
Հունգարիան արգելափակել է Բելառուսի վերաբերյալ ԵՄ համատեղ հայտարարությունը
Քաղաքականություն
27.01.2025 | 13:43
Հունգարիայի ներկայացուցիչներն արգելափակել են ԵՄ երկրների համատեղ հայտարարությունը Բելառուսում նախագահական ընտրությունների արդյունքները չճանաչելու վերաբերյալ։ Այս մասին գրում է DW-ի ռուսական ծառայությունը։
ԵՄ-ն չի կարողացել հրապարակել իր 27 անդամների համատեղ հայտարարությունը Հունգարիայի ստորագրության բացակայության պատճառով։ Փոխարենը իրենց հայտարարությունն են տարածել ԵՄ արտաքին հարաբերությունների և անվտանգության քաղաքականության գերագույն ներկայացուցիչ Կայա Կալլասն ու Հարևանության և ընդլայնման քաղաքականության հարցերով հանձնակատար Մարթա Կոսը։
Փաստաթղթում, մասնավորապես, ընդգծվում է, որ հունվարի 26-ի ընտրությունները «ոչ ազատ, ոչ արդար» են եղել, և որ բելառուս ժողովուրդն «արժանի է իրական ձայնի»։
«Բելառուսում մարդու իրավունքների անողոք ճնշումը, քաղաքական մասնակցության սահմանափակումը և անկախ լրատվամիջոցներին անհասանելիությունը զրկել են ընտրական գործընթացը ցանկացած լեգիտիմությունից»,- գրել են Կալլասը և Կոսը:
Նրանք ընդգծել են, որ Բրյուսելը կշարունակի սահմանափակումներ կիրառել բելառուսական ռեժիմի նկատմամբ, «միաժամանակ, ֆինանսական աջակցություն ցուցաբերելով քաղաքացիական հասարակությանը, արտաքսման մեջ գտնվող ժողովրդավարական ուժերին և բելառուսական մշակույթին»։
Բելառուսի Կենտրոնական ընտրական հանձնաժողովը հրապարակել է հունվարի 26-ին երկրում անցկացված նախագահական ընտրությունների նախնական արդյունքները։ ԿԸՀ-ի տվյալներով՝ ամենաշատ ձայները ստացել է Ալեքսանդր Լուկաշենկոն՝ 86,82 տոկոս։
Թարգմանությունը՝ Տաթև Ֆռանգյանի
