Բելառուսում նախագահական ընտրություններ են

Այսօր Բելառուսում մեկնարկել են նախագահական ընտրությունները։ Ընտրատեղամասերը բաց կլինեն ժամը 08:00-ից մինչև 20:00-ն․ հայտնում է ՌԻԱ Նովոստի-ն։

Ընտրացուցակներում ընդգրկված է ավելի քան 6,9 մլն մարդ։ Ընդհանուր առմամբ, հանրապետությունում գործում է 5325 տեղամաս, որից 207-ը՝ հիվանդանոցներում, առողջարաններում, հանգստյան տներում և ժամանակավոր բնակության այլ վայրերում։

Բայց արտերկրում այս ընտրությունների համար ընտրատեղամասեր չեն բացվելու։ Իշխանությունները դա բացատրել են, մասնավորապես, անվտանգությունն ապահովելու անկարողությամբ, ինչպես նաև 2020 թվականի նախագահական ընտրություններից հետո Արևմուտքի հետ հարաբերությունների վատթարացման և ընդդիմության բողոքի ակցիաները ճնշելու պատճառով դիվանագիտական ​​կորպուսի կրճատմամբ։

Միևնույն ժամանակ, Կենտրոնական ընտրական հանձնաժողովն ընդգծել է, որ արտերկրում մշտապես բնակվող քաղաքացիները կարող են քվեարկել Մինսկի վեց ընտրատեղամասերից մեկում և հինգ շրջանային կենտրոններում։ Վերջին տվյալներով՝ այս հնարավորությունից օգտվել է 52 մարդ Ռուսաստանից, Գերմանիայից, Իտալիայից, Լիտվայից, Լեհաստանից, Ուկրաինայից, ԱՄՆ-ից, Մեծ Բրիտանիայից, Վրաստանից, Ֆրանսիայից և Բելգիայից։

Բելառուսի նախագահի պաշտոնին հավակնում է հինգ թեկնածու. պետության ներկայիս ղեկավար Ալեքսանդր Լուկաշենկոն, Բելառուսի Լիբերալ-դեմոկրատական ​​կուսակցության առաջնորդ Օլեգ Գայդուկևիչը, Աշխատանքի և արդարության հանրապետական ​​կուսակցության առաջնորդ Ալեքսանդր Խիժնյակը, Բելառուսի Կոմկուսի Կենտկոմի առաջին քարտուղար Սերգեյ Սիրանկովը, նախորդ ընտրությունների նախկին թեկնածու, ձեռներեց, անկուսակցական Աննա Կանոպացկայան։

Քվեաթերթիկներում կա նաև «Բոլորին դեմ» սյունակը։