20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Կալիֆորնիայում նոր անտառային հրդեհ է բռնկվել․ ավելի քան 50,000 մարդ ծանուցվել է տարհանման մասին
Քաղաքականություն
23.01.2025 | 14:21
Լոս Անջելեսի հյուսիսում նոր անտառային հրդեհ է բռնկվել՝ ընդամենը մի քանի ժամում գրավելով շուրջ 39 քառակուսի կիլոմետր տարածք, գրում է Current time:
AP-ի փոխանցմամբ՝ ավելի քան 50 հազար մարդ տարհանման հրամաններ և նախազգուշացումներ է ստացել։
Հրդեհը սկսվել է հունվարի 22-ի առավոտյան Կաստայիկ լճի շրջանում՝ Լոս Անջելես քաղաքից 80 կիլոմետր հյուսիս։ Մի քանի ժամում հրդեհը ոչնչացրել է 39 քառակուսի կիլոմետր տարածք և շարունակում է տարածվել։ Այն համեմատելի է Լոս Անջելեսում երկու ավերիչ հրդեհներից մեկի՝ «Իտոն» հրդեհի տարածքի 66 տոկոսի հետ։
CNN-ի հաղորդմամբ՝ տարածքը, որտեղ բռնկվել է հրդեհը, հիմնականում ծածկված է թփուտներով և արոտավայրերով, որոշ հատվածներում՝ անտառներով։
«Փրկարարները մեծ աշխատանք են անում՝ փորձելով զսպել կրակի տարածումը»,- ասել է Կալիֆորնիայի անտառտնտեսության և հրդեհային պաշտպանության դեպարտամենտի ղեկավար Ջո Թայլերը:
Տարածաշրջանում եղել է եղանակի մասին նախազգուշացում, սակայն քամիներն այնքան ուժեղ չեն եղել, որքան նախորդ հրդեհների ժամանակ։ Հրդեհը մարելու համար ուղարկվել է ավելի քան 4000 հրշեջ։
Հիշեցնենք, որ հունվարի 7-ին Լոս Անջելեսի շրջանում սկսված անտառային հրդեհները համարվում են նահանգի պատմության մեջ ամենամեծը։ Չոր ու քամոտ եղանակը, ըստ օդերևութաբանների, հրդեհի արագ տարածման պատճառ է դարձել։ Հրդեհների ընդհանուր մակերեսը գերազանցել է 16 հազար հեկտարը։ Զոհվել է առնվազն 25 մարդ։
Թարգմանությունը՝ Էմմա Չոբանյանի
