22.06.2026 | 15:10
Գյումրի-Մոսկվա չվերթի օդանավի արտակարգ վայրէջքը Դաղստանում // ՀՀ-ն Ադրբեջանի տարածքով ինտերնետ կստանա․ ԼՈՒՐԵՐ
Իրանի դատարանը հաստատել է Ադրբեջանի դեսպանատան վրա հարձակվողի մահապատիժը
Քաղաքականություն
22.01.2025 | 21:57
Իրանի Գերագույն դատարանը հաստատել է Թեհրանում Ադրբեջանի դեսպանատան վրա հարձակված Յասին Հուսեյնզադեի մահապատիժը։ Այս մասին հայտարարել է երկրի դատական համակարգի ներկայացուցիչ Ասկեր Ջահանգիրին, գրում են ադրբեջանական լրատվամիջոցները։
Նա նշել է, որ գործն ուղարկվել է դատարան՝ հետագա քննարկման համար։ Ըստ Ջահանգիրիի՝ դատավարությանը կհրավիրվեն տուժածների հարազատները։
«Եթե տուժողները պահանջեն մահապատժի ենթարկել հարձակվողին, ապա գործը կուղարկվի համապատասխան կառույց՝ պատժի կատարման համար»,- պարզաբանել է նա։
Հիշեցնենք, որ 2023 թվականի հունվարի 27-ին Իրանում Ադրբեջանի դեսպանատան վրա զինված հարձակման հետևանքով 1 մարդ էր զոհվել, 2-ը՝ վիրավորվել։ Պաշտոնական Բաքուն դեսպանատան վրա իրականացված հարձակումն «ահաբեկչություն» էր որակել։ Միջադեպից հետո Բաքուն տարհանել էր Թեհրանում Ադրբեջանի դեսպանատան աշխատակիցներին, և դադարեցրել դեսպանատան գործունեությունը։
Բաքվի դիվանագիտական առաքելությունը վերսկսել է գործունեությունը անցյալ տարվա հուլիսին՝ նոր հասցեով։ Որոշումն ընդունվել է պաշտոնական Բաքվի և Թեհրանի բանակցություններից հետո։
Թարգմանությունը՝ Էմմա Չոբանյանի
