30.04.2026 | 18:30
Հնդկաստանն ու Հայաստանը ռազմական տեխնիկայի համատեղ մշակում են սկսել. The Indian Express
Ֆրանսիան Ասադի կալանավորման նոր օրդեր է տվել
Քաղաքականություն
22.01.2025 | 14:02
Ֆրանսիացի դատավորները Սիրիայի տապալված առաջնորդ Բաշար Ասադի կալանավորման օրդեր են տվել՝ ռազմական հանցագործություններին մեղսակցության կասկածանքով, այդ թվում՝ խաղաղ բնակչության վրա կանխամտածված հարձակում կազմակերպելու համար։ Այս մասին հայտնել է իրավապահ մարմինների աղբյուրը, գրում է Reuters-ը։
Օրդերը տրվել է հունվարի 20-ին՝ Սիրիայում 2017 թվականի հունիսի 7-ին ռմբակոծության ժամանակ սպանված ֆրանս-սիրիացի Սալահ Աբու Նաբուրի գործի հետաքննության շրջանակում։
Սա ֆրանսիացի դատավորների կողմից տրված Սիրիայի նախկին առաջնորդի կալանավորման երկրորդ օրդերն է, որի իշխանությունը տապալվել է 2024 թվականի դեկտեմբերի սկզբին ապստամբների կողմից՝ իսլամիստ Հայաթ Թահրիր ալ-Շամ (HTS) խմբավորման գլխավորությամբ:
2023 թվականի նոյեմբերին ֆրանսիացի դատավորներն Ասադի կալանավորման առաջին օրդերն էին տվել՝ մարդկության դեմ հանցագործություններին և ռազմական հանցագործություններին մեղսակցության մեղադրանքով։ Այն հետևել է 2013 թվականի օգոստոսին Դումայում և Արևելյան Ղուտայի շրջանում քիմիական հարձակումների վերաբերյալ Ֆրանսիայի հետաքննությանը, որի հետևանքով զոհվել էր ավելի քան 1000 մարդ:
Ասադի կառավարությունը նախկինում հերքել է երկրում քաղաքացիական պատերազմի ժամանակ իր հակառակորդների նկատմամբ քիմիական զենքի կիրառումը։
Թարգմանությունը՝ Էմմա Չոբանյանի
