Քաղաքականություն
20.01.2025 | 22:55
«Այսօր կարևոր օր է, ԱՄՆ-ում տեղի է ունենում նոր նախագահի երդմնակալության արարողությունը։ Սա իր բնույթով շրջադարձային մի բան է ԱՄՆ-ի համար»,- այս մասին կառավարության նիստում հայտարարել է Վրաստանի վարչապետ Իրակլի Կոբախձեն, փոխանցում է վրացական «Առաջին ալիքը»։
«Ուզում եմ ընդգծել, որ անցած չորս տարիները բավականին բարդ էին ինչպես մեր երկրի, այնպես էլ ողջ աշխարհի համար։ Եղել են բազմաթիվ ճգնաժամեր, պատերազմն Ուկրաինայում և Մերձավոր Արևելքում շարունակվում է, Եվրոպան ապրում է լուրջ տնտեսական ճգնաժամ, իսկ կեղծ ազատական քարոզչությունն էլ ավելի է տարածվել վերջին չորս տարիների ընթացքում։ «Լիբերալ ֆաշիզմը» խնդիր է դարձել ոչ միայն մեր երկրի, այլև այլ երկրների համար։ Այս չորս տարիների ընթացքում այն նոր զարգացում է ապրել»,-ասել է Կոբախիձեն՝ նշելով, թե,իբր, այդ ընթացքում Վրաստանում հեղափոխության չորս փորձ է եղել ու հույս հայտնել, որ հաջորդ չորս տարիները կլինեն որակապես տարբեր, ավելի խաղաղ աշխարհի համար և կարտացոլվեն երկրում։
«Նախագահ Թրամփը հայտարարել է շատ հավակնոտ ծրագրի մասին՝ «խորը պետությանը՝ դիփ սթեյթին, հաղթելու ծրագիր, և մենք ցանկանում ենք հաջողություն մաղթել նախագահ Թրամփին այս գործում։ Այս պայքարում հաջողությունը վճռորոշ կլինի վրաց-ամերիկյան հարաբերությունների կարգավորման համար։ Մենք մեծ հույս ունենք, որ այս պայքարը կավարտվի «խորը պետության» նկատմամբ նախագահ Թրամփի հաղթանակով, որը կնպաստի աշխարհում, մասնավորապես մեր տարածաշրջանում խաղաղության ապահովմանը և կնպաստի ճիշտ և առողջ արժեքների տարածմանը»,-ասել է Վրաստանի վարչապետը՝ հավելելով, որ պատրաստ են հարաբերությունների վերանայման։
«Մենք ևս մեկ անգամ հաստատում ենք մեր պատրաստակամությունը հարաբերությունների որակական վերանայման, ԱՄՆ-ի հետ մաքուր էջից ռազմավարական գործընկերության վերսկսման։ Մենք հուսով ենք, որ այս ուղղությամբ մեզ զգալի հաջողություն է սպասվում։ Այս առումով 2025 թվականը շատ կարևոր տարի է լինելու»,- ասել է Իրակլի Կոբախիձեն։
Թարգմանությունը՝ Էմմա Չոբանյանի
