10.08.2026 | 17:24
Բանավեճ Էդգար Ղազարյանի ու Վիլեն Գաբիելյանի միջև. ՏԵՍԱՆՅՈՒԹ
Թրամփը մտադիր է գաղտնազերծել և հրապարակել Ջոն Քենեդիի ու Մարտին Լյութեր Քինգի սպանություններին վերաբերող փաստաթղթեր
Քաղաքականություն
20.01.2025 | 13:36
Դոնալդ Թրամփը նախօրեին հայտարարել է, որ առաջիկա օրերին կհրապարակի գաղտնի փաստաթղթեր՝ կապված ԱՄՆ նախագահ Ջոն Քենեդիի, սենատոր Ռոբերտ Քենեդիի և քաղաքացիական իրավունքների առաջնորդ Մարտին Լյութեր Քինգ կրտսերի սպանությունների հետ, գրում է Reuters-ը։
Թրամփը, որը երկուշաբթի օրը վերադառնում է Սպիտակ տուն, նախընտրական արշավի ժամանակ խոստացել էր հրապարակել գաղտնի հետախուզական և իրավապահ մարմինների փաստաթղթերը 1963 թվականին ԱՄՆ 35-րդ նախագահ Քենեդիի սպանության վերաբերյալ։
Նա նման խոստում էր տվել նաև իր պաշտոնավարման ընթացքում 2017-ից 2021 թվականներին, և հրապարակել որոշ փաստաթղթեր, բայց, ի վերջո, Կենտրոնական հետախուզական գործակալության և Հետաքննությունների դաշնային բյուրոյի ճնշման տակ հետ էր կանգնել և գաղտնի պահել փաստաթղթերի մեծ մասը՝ վկայակոչելով ազգային անվտանգության մտահոգությունները:
«Առաջիկա օրերին մենք պատրաստվում ենք հրապարակել նախագահ Ջոն Քենեդիի, նրա եղբոր Ռոբերտ Քենեդիի, ինչպես նաև դոկտոր Մարտին Լյութեր Քինգ կրտսերի սպանությունների և հանրային մեծ հետաքրքրություն ներկայացնող այլ թեմաների հետ կապված մնացած գրառումները»,-ասել է Թրամփը Վաշինգտոնի կենտրոնում տեղի ունեցած հանրահավաքի ժամանակ։
Նա չի հստակեցրել, թե որ փաստաթղթերն են հրապարակվելու, և չի խոստացել ընդհանուր գաղտնազերծում։ Հիշեցնենք, որ և՛ Քինգը և՛ Ռոբերտ Քենեդին սպանվել են 1968թ-ին։
Թարգմանությունը՝ Էմմա Չոբանյանի
