Քաղաքականություն
17.01.2025 | 22:53
Քուրդիստանի աշխատավորական կուսակցության (PKK) պաշտոնյան ասել է, որ զինյալ խմբավորումը կհամաձայնի հեռանալ Սիրիայի հյուսիս-արևելքից, եթե ԱՄՆ-ի դաշնակից քրդական «Սիրիայի դեմոկրատական ուժերը» (SDF) պահպանեն զգալի համատեղ առաջնորդական դերն այնտեղ, գրում է Reuters-ը։
«Ցանկացած նախաձեռնություն, որը կհանգեցնի նրան, որ SDF-ը կառավարի հյուսիս-արևելյան Սիրիան, կամ որում նրանք նշանակալի դեր կունենան համատեղ ղեկավարության մեջ, կստիպի մեզ համաձայնվել լքել տարածաշրջանը»,- ասել է Հյուսիսային Իրաքում խմբավորման քաղաքական գրասենյակի ներկայացուցիչը։
PKK-ն համարվում է ահաբեկչական խմբավորում Թուրքիայի, ԱՄՆ-ի և Եվրոպայի կողմից։ Անցյալ ամիս նախագահ Բաշար Ասադի պաշտոնանկությունից հետո Անկարան սպառնացել է ջախջախել սիրիական քրդական «Ժողովրդական պաշտպանության միավորումներ»-ի (YPG) զինյալներին, որոնք SDF-ի մասն են, որոնք, ըստ նրա, PKK-ի ընդլայնումն են:
Անկարան հայտարարել է, որ SDF-ը պետք է ցրվի, և PKK-ի բոլոր բարձրաստիճան անդամները պետք է վտարվեն Սիրիայից, հակառակ դեպքում՝ Թուրքիան հարված կհասցնի:
Վաշինգտոնը կոչ է արել «կառավարվող անցում կատարել» իր քուրդ դաշնակիցներին, իսկ SDF-ի հրամանատարն ասել է, որ PKK-ի բոլոր անդամները կլքեն Սիրիան, եթե Թուրքիան համաձայնի հրադադարի:
Գրավոր հայտարարության մեջ PKK-ի պաշտոնյան նշել է, որ եթե խմբավորումը լքի Սիրիան, կշարունակի հեռվից մոնիթորինգ իրականացնել և գործել թուրքական ուժերի դեմ կամ անհրաժեշտության դեպքում միջոցներ ձեռնարկել։
«Սիրիայի ապագան կորոշվի ամսի 20-ից հետո, երբ Թրամփը ստանձնի պաշտոնը»,- ասել է պաշտոնյան՝ նկատի ունենալով ԱՄՆ նորընտիր նախագահ Դոնալդ Թրամփի երդմնակալության արարողությունը։
Թարգմանությունը՝ Էմմա Չոբանյանի
