20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Վաշինգտոնը Թրամփի երդմնակալությունից առաջ ուժեղացրել է անվտանգության միջոցառումները
Քաղաքականություն
15.01.2025 | 13:17
Հունվարի 20-ին ԱՄՆ նախագահ Դոնալդ Թրամփի երդմնակալության արարողությունից առաջ Վաշինգտոնի անվտանգության ծառայությունները բերվել են բարձր պատրաստվածության մակարդակի։ Անվտանգության նկատառումներից ելնելով՝ հանրապետական գործչի պաշտոնական երդմնակալության օրը քաղաքի մի մասը փակ կլինի։ Հետախուզական ծառայությունները չեն բացառում Թրամփի վրա հարձակման հնարավորությունը, սակայն կոնկրետ սպառնալիքներ չեն տեսնում։
«Մենք գտնվում ենք ուժեղացված սպառնալիքի միջավայրում»,- ասել է ԱՄՆ գաղտնի ծառայության հատուկ գործակալ Մեթ Մաքքուլը, որի խոսքերն է մեջբերում Reuters-ը։
Կապիտոլիումի ոստիկանապետ Թոմաս Մունգերը ճեպազրույցի ժամանակ ասել է, որ իրավապահ մարմինները գտնվում են «բարձր զգոնության» վիճակում՝ միայնակ զինված անձի սպառնալիքի պատճառով։
Երդմնակալության արարողությունից առաջ Վաշինգտոնի կենտրոնի մի հատվածը՝ Սպիտակ տնից մինչև Կապիտոլիում մոտ 3 կմ երկարությամբ, փակ կլինի երթևեկության համար։ Մուտքերը փակվելու են բետոնե պատնեշներով, աղբատար մեքենաներով և «այլ ծանր առարկաներով»։
Սև ցանկապատը, որի բարձրությունը 2 մետր է, կլինի ամենաերկարը, որը երբևէ կանգնեցվել է քաղաքում, ասել են պաշտոնյաները: Հասարակական կարգի պահպանման համար կներգրավվեն Ազգային գվարդիայի 7800 զինվորներ և 4000 ոստիկաններ։
Թրամփը 2024 թվականին երկու մահափորձի թիրախ է դարձել։ Հուլիսի 14-ին Թոմաս Մեթյու Քրուքսը ելույթի ժամանակ կրակ է բացել հանրապետականի ուղղությամբ, վերջինը վիրավորվել է աջ ականջից։ Երկրորդ մահափորձը տեղի է ունեցել սեպտեմբերի 15-ին Ֆլորիդայի գոլֆի ակումբի մոտ, ոչ ոք չի տուժել։
Թարգմանությունը՝ Տաթև Ֆռանգյանի
