Էնգելսում ԱԹՍ-ները կրկին արդյունաբերական ձեռնարկության են հարվածել, Կազանում ուժեղ հրդեհ է, սահմանափակվել է օդանավակայանների աշխատանքը

Հունվարի լույս 14-ի առավոտյան ուկրաինական անօդաչու սարքերը կրկին հարվածել են Էնգելսի «արդյունաբերական ձեռնարկությանը»։ Կազանում, Կալուգայում, Սարատովում և Տամբովում սահմանափակվել է օդանավակայանների աշխատանքը։ Ռուսական Telegram ալիքները գրում են, որ անօդաչու թռչող սարքերը հարձակվել են Կազանի «Օրգսինթեզ» քիմիական գործարանի վրա, փոխանցում է Current Time-ը։

Սարատովի մարզի նահանգապետ Ռոման Բուսարգինի փոխանցմամբ՝ Էնգելսի «արդյունաբերական ձեռնարկությունը» տուժել է անօդաչու թռչող սարքի հարձակման հետևանքով։ Նա նաև անվանել է մեկ շաբաթ առաջ անօդաչու թռչող սարքերով խոցված նավթի պահեստի մասին։ Այդ ժամանակ բռնկված հրդեհը տեղայնացվել է միայն հունվարի 13-ին։

«Արտակարգ և օպերատիվ ծառայություններն աշխատում են ուժեղացված ռեժիմով»,- գրել է Բուսարգինը։

SHOT Telegram ալիքը, վկայակոչելով տեղի բնակիչներին, հայտնում է քաղաքում պայթյունների մասին։

Ռուսական Radar.ru մոնիթորինգային հեռուստաալիքի փոխանցմամբ՝ նոր անօդաչու սարքեր են թռչում դեպի Էնգելս։ ԱԹՍ-ների հարվածի պատճառով դպրոցներում դասերը կանցկացվեն հեռակա կարգով՝ ինչպես Էնգելսում, այնպես էլ Սարատովում։

Ավելի ուշ Բուսարգինը խոստովանել է, որ անօդաչու թռչող սարքի հարձակման հետևանքով Սարատովում վնասվել է նաև «արդյունաբերական ձեռնարկություն»։

«Այսօր Սարատովը և Էնգելսը ենթարկվել են զանգվածային անօդաչու թռչող սարքերի հարձակման։ ՀՕՊ համակարգերը ոչնչացրել են մեծ թվով թիրախներ։ Հարձակման հետևանքով Սարատովում և Էնգելսում վնասվել են երկու արդյունաբերական ձեռնարկություններ»,- գրել է Բուսարգինը։

Ըստ Telegram ալիքների՝ Սարատովի այս ձեռնարկությունը կարող է լինել նավթավերամշակման գործարան։

Միաժամանակ, Թաթարստանի իշխանությունները պնդում են, որ Կազանի արվարձաններում անօդաչու թռչող սարքի հարվածի հետևանքով գազի բալոն է բռնկվել։

Թարգմանությունը՝ Տաթև Ֆռանգյանի