30.04.2026 | 18:30
Հնդկաստանն ու Հայաստանը ռազմական տեխնիկայի համատեղ մշակում են սկսել. The Indian Express
Շոլցն արգելափակում է Ուկրաինային օգնության նոր փաթեթը. Der Spiegel
Քաղաքականություն
10.01.2025 | 12:21
Գերմանիայի արտաքին գործերի նախարար Աննալենա Բերբոքը և պաշտպանության նախարար Բորիս Պիստորիուսը ցանկանում են Բունդեսթագի ընտրություններից առաջ, որոնք նախատեսված են փետրվարի 23-ին, Ուկրաինային սպառազինությունների մատակարարման պլանից դուրս շուրջ 3 միլիարդ եվրո հատկացնել, սակայն դրան խոչընդոտում է կանցլեր Օլաֆ Շոլցը։ Այս մասին հայտնում է գերմանական Der Spiegel-ը, որին վկայակոչում է DW-ի ռուսական ծառայությունը։
Նշվում է, որ Ուկրաինա ուղարկվելիք սպառազինությունների ցանկը, որը կազմվել է 2024 թվականի նոյեմբերին գերմանական կառավարական կոալիցիայի փլուզումից անմիջապես հետո, ներառում է երեք Iris-T հակաօդային պաշտպանության մարտկոցներ՝ դրանց համար նախատեսված հրթիռներով, Patriot հրթիռներ, տասը անվավոր հաուբիցներ և հրետանային զինամթերք։
Գերմանիայի ԱԳՆ-ն ու ՊՆ-ն հավելյալ աջակցության անհրաժեշտությունը հիմնավորել են նրանով, որ Կիևի հրատապ կարիքները չեն կարող դիտարկվել նախկին պլանավորմամբ, մասնավորապես, Ուկրաինայի ռազմական իրավիճակը զգալիորեն վատթարացել է վերջին ամիսներին ռուսական հարձակման արագացման պատճառով։ Բացի այդ, ԱՄՆ-ում նախագահական ընտրություններում Դոնալդ Թրամփի հաղթանակից հետո անհասկանալի է դարձել՝ արդյո՞ք Վաշինգտոնը կշարունակի ռազմական աջակցություն ցուցաբերել Ուկրաինային հունվարի 20-ին Թրամփի երդմնակալությունից հետո։
Այս ծրագրի իրականացումը կանգ է առել հունվարի սկզբին այն բանից հետո, երբ կանցլերի գրասենյակը ոչ պաշտոնապես հասկացրել է, որ չի աջակցում Կիևի լրացուցիչ ֆինանսավորմանը: Ըստ Der Spiegel-ի՝ պատճառը Գերմանիայի ապագա կառավարությանը կատարված փաստի առջև չթողնելու ցանկությունն է։
Բացի այդ, Շոլցը հրատապ գործողությունների անհրաժեշտություն չի տեսնում, քանի որ բավարար է համարում Ուկրաինային ռազմական օգնության համար 2025 թվականի նախնական բյուջեով նախատեսված շուրջ 4 միլիարդ եվրոն և մատնանշում է 50 միլիարդ դոլար վարկի օգտագործման հնարավորությունը G7-ի կողմից՝ տրամադրված ռուսական սառեցված պետական ակտիվներից ստացված եկամուտներից:
Սոցիալ-դեմոկրատների շրջանում Der Spiegel-ի աղբյուրները ենթադրում են, որ Շոլցը չի ցանկանում նախընտրական քարոզարշավի ընթացքում հայտարարել Ուկրաինային զենքի հետագա մատակարարումների մասին, որպեսզի չվանի պոտենցիալ ընտրողներին։
Թարգմանությունը՝ Էմմա Չոբանյանի
