16.12.2025 | 16:30
Փոշի, կեղտ, չկառուցված․ Խաչատուր Սուքիասյանը՝ Կենտրոնի մասին․ ՏԵՍԱՆՅՈՒԹ
Սիրիայում թուրքամետ և քրդական ուժերի միջև մարտերը 37 մարդու կյանք են խլել
Քաղաքականություն
09.01.2025 | 16:24
Սիրիայի հյուսիսային Մանբիջ շրջանում Թուրքիայի կողմից աջակցվող խմբավորումների և քրդերի գլխավորած ուժերի միջև բախումների հետևանքով 37 մարդ է զոհվել, գրում է AFP-ն։
Մարտերը տեղի են ունենում այն ֆոնին, երբ ԱՄՆ-ը հայտարարել էր, որ աշխատում է լուծել Սիրիայում Թուրքիայի մտահոգությունները՝ ՆԱՏՕ-ի դաշնակցին հետ պահելու քուրդ զինյալների դեմ հարձակումը սաստկացնելուց:
Մարդու իրավունքների պաշտպանության սիրիական դիտորդական խումբը հայտնել է, որ «վերջին ժամերին Մանբիջի գյուղերում ծանր մարտեր են տեղի ունեցել քրդական «Սիրիայի դեմոկրատական ուժերի» և Թուրքիայի կողմից աջակցվող «Ազգային բանակ»-ի միջև՝ թուրքական օդային հարվածների աջակցությամբ։
«Հարձակումները, նախնական տվյալներով, 37 մարդու կյանք են խլել, հիմնականում Թուրքիայի կողմից աջակցվող զինյալների, ինչպես նաև SDF-ի վեց մարտիկների և հինգ քաղաքացիական անձանց»,- նշում է դիտորդական խումբը։
Հաղորդվում է, որ առնվազն 322 մարդ է զոհվել Մանբիջի գյուղական շրջաններում անցած ամսվանից սկսած մարտերի ընթացքում:
Մազլում Աբդին, որը գլխավորում է ԱՄՆ-ի կողմից աջակցվող SDF-ը, ասել է, որ իր խումբն աջակցում է «սիրիական տարածքի միասնությանը և ամբողջականությանը»: AFP-ին փոխանցած գրավոր հայտարարության մեջ նա կոչ է արել Սիրիայի նոր իշխանություններին «միջամտել, որպեսզի Սիրիայում հրադադար լինի»: Աբդիի մեկնաբանությունները հաջորդում են նրան, ինչ նա անվանել է «դրական» հանդիպում քուրդ առաջնորդների և Դամասկոսի իշխանությունների միջև անցյալ ամսվա վերջին:
Սիրիայի հյուսիսում Թուրքիայի կողմից աջակցվող խմբավորումները վերսկսել են SDF-ի դեմ պայքարը, երբ նոյեմբերի 27-ին իսլամիստների գլխավորած ապստամբները հարձակում սկսեցին, որի արդյունքում տապալվեց Սիրիայի նախագահ Բաշար Ասադը։
Անկարայի կողմնակից խմբավորումներին հաջողվել է գրավել քրդերի կողմից վերահսկվող Մանբիջն ու Թալ Ռիֆաթը հյուսիսային Հալեպի նահանգում՝ չնայած Մանբիջի շրջանում հրադադար հաստատելու՝ ԱՄՆ-ի ջանքերին:
Թարգմանությունը՝ Էմմա Չոբանյանի
