09.01.2025 | 22:14
Թուրքիան կիբերանվտանգության տնօրինություն է հիմնում տվյալների զանգվածային արտահոսքից հետո
«Երևակայությունս չի բավականացնում»․ Դանիայի վարչապետը՝ Գրենլանդիայի համար ուժ կիրառելու՝ Թրամփի հայտարարության մասին
Քաղաքականություն
08.01.2025 | 19:44
Դանիայի վարչապետ Մետե Ֆրեդերիկսենը կասկածում է, որ Միացյալ Նահանգները կարող է ռազմական կամ տնտեսական միջոցներ կիրառել Գրենլանդիայի՝ Դանիայի ինքնավար տարածքի նկատմամբ վերահսկողություն հաստատելու համար։ Այդ մասին Ֆրեդերիկսենն ասել է հունվարի 7-ին դանիական TV 2 հեռուստաալիքին տված հարցազրույցում։
«Երևակայությունս չի բավականացնում, որպեսզի պատկերացնեմ, որ մենք կհասնենք այդ կետին»,- ասել է վարչապետը։
Նա նշել է, որ Միացյալ Նահանգները Դանիայի «ամենակարևոր և ամենամոտ դաշնակիցն է»։ Ըստ պաշտոնյայի՝ Դանիան չի ցանկանում ԱՄՆ-ի հետ առևտրային պատերազմ։
Մետե Ֆրեդերիկսենը բնակիչներին կոչ է արել հանգստություն պահպանել և չանհանգստանալ ԱՄՆ նորընտիր նախագահ Դոնալդ Թրամփի՝ Գրենլանդիայի նկատմամբ վերահսկողություն հաստսատելու ցանկության կապակցությամբ: Նրա խոսքով՝ հետագա զարգացումներն ԱՄՆ ապագա նախագահի վարչակազմի, այլ ոչ թե լրագրողների հետ քննարկելու հարց են։ Ֆրեդերիկսենը ողջունել է ԱՄՆ-ի հետաքրքրությունը Գրենլանդիայի նկատմամբ, սակայն նշել է, որ «դա պետք է արվի Գրենլանդիայի ժողովրդի նկատմամբ հարգանքով»:
«Միևնույն ժամանակ, դա պետք է արվի այնպես, որ Դանիան և ԱՄՆ-ը շարունակեն համագործակցել ՆԱՏՕ-ում և այլ կազմակերպություններում»,- հավելել է Դանիայի վարչապետը։
Դոնալդ Թրամփն իր առաջին ժամկետից ի վեր բազմիցս ասել է, որ Գրենլանդիան պետք է դառնա Միացյալ Նահանգների մաս։ Նա այդ գաղափարին վերադարձել է 2024 թվականին ԱՄՆ նախագահ ընտրվելուց հետո։
Թարգմանությունը՝ Տաթև Ֆռանգյանի
