30.04.2026 | 15:42
Եվգենի Լովչևն․ Արսեն Զախարյանը կոտրեց իր ֆուտբոլային կարիերան հանուն արտասահման տեղափոխվելու
ՌԴ-ն հայտնել է ԱԹՍ-ների լայնածավալ գրոհի մասին
Քաղաքականություն
08.01.2025 | 13:42
Ռուսաստանը հայտարարել է ուկրաինական անօդաչու սարքերի հերթական լայնածավալ հարձակման մասին։ Անցած գիշեր, ընդհանուր առմամբ, խոցվել է 32 գրոհային անօդաչու թռչող սարք, Telegram-ում հայտնել է ՌԴ Պաշտպանության նախարարությունը։
Ըստ հաղորդագրության՝ 11 անօդաչու թռչող սարք խոցվել է Սարատովի մարզում, չորսը՝ Կուրսկի և Ռոստովի շրջաններում, երեքը՝ Բելգորոդի և Բրյանսկի շրջաններում, երկուսը՝ Կրասնոդարի երկրամասում, մեկը՝ Վոլգոգրադի շրջանի տարածքում և չորսը՝ Ազովի ծովի ջրերի վրա, փոխանցում է DW-ի ռուսական ծառայությունը։
Սրա հետ մեկտեղ, Ռոստովի նահանգապետի պաշտոնակատար Յուրի Սլյուսարը հայտարարել է, որ շրջանը հարձակման է ենթարկվել հինգ անօդաչու թռչող սարքերի կողմից։ Դրանք խոցվել են Միլերովսկի, Չերտկովսկի և Ազովսկի շրջաններում, սակայն զոհեր, տուժածներ և ավերածություններ տեղում չեն եղել։
Իր հերթին, Սարատովի մարզի նահանգապետ Ռոման Բուսարգինը հայտարարել է Սարատովում և Էնգելսում ԱԹՍ-ների զանգվածային հարձակման մասին։ Նրա խոսքով՝ որոշակի «արդյունաբերական օբյեկտի» վրա խոցված անօդաչու թռչող սարքերի բեկորների ընկնելու հետևանքով վնաս կա, սակայն ոչ ոք չի տուժել։ Բուսարգինը հայտնել է նաև, որ հարձակման ենթարկված ձեռնարկությունում ստեղծվել է օպերատիվ շտաբ։
«Մենք տեղում մասնագետների հետ քննարկել ենք իրավիճակը և հրդեհաշիջման ծրագիրը, կան բավարար ուժեր և ռեսուրսներ՝ հրդեհը տեղայնացնելու համար։ Ձեռնարկությունում աշխատում են ԱԻՆ, մարզային փրկարարական ծառայության և այլ մասնագիտացված ծառայությունների մասնագետներ» ,- նշել է նա։
Միաժամանակ, Telegram-ի ալիքները, վկայակոչելով տեղի բնակիչներին, հայտնում են Էնգելսի նավթի պահեստի տարածքում պայթյունների մասին։
Թարգմանությունը՝ Տաթև Ֆռանգյանի
