14.03.2026 | 20:09
Նյու Յորքում Հայաստանի նախաձեռնությամբ քննարկվել է գենդերային հավասարության դերը կենսաբազմազանության պահպանման գործում
Ուկրաինայի զինված ուժերը մարտավարական հաջողությունների է հասել Կուրսկի մարզում․ ISW
Քաղաքականություն
07.01.2025 | 17:17
Ուկրաինայի զինված ուժերն առաջխաղացում են գրանցել Կուրսկի շրջանում, ինչը կարող է վկայել այս ուղղությամբ կամ ռազմաճակատի այլ վայրերում ուկրաինական համակարգված գործողության մասին, գրում է Պատերազմի ուսումնասիրության ամերիկյան ինստիտուտը (ISW):
Տվյալները հիմնված են հունվարի 5-ին և 6-ին հրապարակված աշխարհագրական կադրերի վրա: Դրանք ցույց են տալիս ուկրաինական զինված ուժերի առաջխաղացումը Սուջայի հյուսիս-արևելքում՝ հարավային Բերդինոյում, Ռուսսկոյե Պոպերեչնիի կենտրոնական և Նովոսոտնիցկոեի կենտրոնական հատվածում:
Ըստ վերլուծաբանների՝ ավելի վաղ ՌԴ ՊՆ-ն և ռազմական բլոգերները հայտարարել էին, որ ռուսական բանակը հետ է մղել ուկրաինական մեքենայացված ստորաբաժանումների հարձակումը Բերդինի և Նովոսոտնիցկիի մոտ։
Բացի այդ, ինստիտուտի տվյալներով, հունվարի 6-ին ռուսական ուժերը փորձել են օգտագործել ուկրաինական հարձակումները Սուջայից հյուսիս-արևելք՝ հարձակվելու Կուրսկի շրջանում ուկրաինական հարձակման այլ հատվածների վրա: Հունվարի 5-ի քարտեզները ցույց են տալիս, որ ռուսական ուժերն առաջ են շարժվել Մալայա Լոկնյա գյուղից դեպի արևմուտք, որը գտնվում է Սուջայից հյուսիս-արևմուտք:
ISW-ն նշում է, որ ռուսական բանակը, հավանաբար, վերաբաշխել է 177-րդ ծովային գնդի ստորաբաժանումները Զապորոժիեի շրջանի արևմտյան մասից Կուրսկի շրջան: Այս մասին է վկայում Պաշտպանության նախարարության հայտարարությունը, որ Կուրսկի շրջանում գործում են «Կասպյան ծովայինների» անօդաչու թռչող սարքերի ստորաբաժանումները։
Թարգմանությունը՝ Տաթև Ֆռանգյանի
