15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Դանիան փոխել է թագավորական զինանշանը՝ Գրենլանդիան գնելու մասին Թրամփի հայտարարությունների ֆոնին
Քաղաքականություն
07.01.2025 | 16:26
Դանիայում իշխող Գլյուքսբուրգների դինաստիայի թագավոր Ֆրեդերիկ X-ը կարգադրել է երկրի զինանշանից հանել երեք թագերը, որոնք վերաբերում են Նորվեգիայի և Շվեդիայի հետ միությանը, փոխարենը ընդգծել շրջաններին, հաղորդում է Current time-ը։
Բրիտանական The Guardian-ի փոխանցմամբ՝ Գրենլանդիայի և Ֆարերյան կղզիների զինանշանները՝ բևեռային արջը և խոյը, զինանշանի նոր տարբերակում մեծացվել և տեղափոխվել են երկրորդ և երրորդ դաշտեր, առաջին և չորրորդ դաշտերում հայտնվել են Դանիայի և Հարավային Յուտլանդիայի խորհրդանիշները:
1819 թվականից ի վեր չորրորդ անգամ է, որ փոխվում է Դանիայի թագավորական զինանշանը։ Նախորդ փոփոխությունները տեղի են ունեցել 1903, 1948 և 1972 թվականներին։
Թագավորական պալատն ասել է, որ զինանշանը, որն օգտագործվում է պաշտոնական փաստաթղթերի և կնիքների վրա, և որի տարրերը թվագրվում են 12-րդ դարով, «ամրապնդում է համագործակցության նշանակությունը»: Ֆրեդերիկ X-ի խոսքով՝ երեք թագերը հանվել են, «քանի որ դրանք այլևս արդիական չեն»։
Լրատվամիջոցը զինանշանի նոր դիզայնը կապում է Գրենլանդիան գնելու ցանկության մասին ԱՄՆ նորընտիր նախագահ Դոնալդ Թրամփի հայտարարությունների հետ։ Միաժամանակ, նշվում է, որ նրա ավագ որդին՝ Դոնալդ Թրամփ կրտսերը, ծրագրում է առաջիկայում մեկօրյա այցով մեկնել Գրենլանդիայի մայրաքաղաք Նուուկ։ Նշվում է, որ նա չի հանդիպի «կառավարական պաշտոնյաների կամ քաղաքական գործիչների հետ»։
Թարգմանությունը՝ Էմմա Չոբանյանի
