Իսրայելի ագրեսիան նպատակ ունի խաթարել սիրիական հեղափոխությունը․ Էրդողան

Իսրայելի ագրեսիան Սիրիայի հեղափոխությունը ստվերելու և նրա ժողովրդի հույսերը ճնշելու ակնհայտ փորձ է։ Այս մասին  հայտարարել է Թուրքիայի նախագահ Ռեջեփ Թայիփ Էրդողանը նախօրեին կառավարության նիստից հետո, գրում է Turkiye today-ը։

«Նույնիսկ եթե Իսրայելը գործի օպորտունիստորեն, վաղ թե ուշ նա ստիպված կլինի հեռանալ իր գրաված հողերից», – ասել է նա՝ խոսելով Իսրայելի՝ վերջին ներխուժման մասին Սիրիա։ Էրդողանը նշել է, որ Թուրքիան կանգնած է «պատմության ճիշտ կողմում» 2011 թվականի սիրիական ճգնաժամի հենց սկզբից ի վեր։

Սիրիական հեղափոխությունը կրկին կենտրոնացրել է համաշխարհային ուշադրությունը երկրի վրա, ասել է Էրդողանը` հավելելով, որ որպես իր «հարևան և եղբայր» Թուրքիան լավագույնս հարմար է նոր փուլը ընկալելու համար:

Ընդգծելով Թուրքիայի անսասան աջակցությունը Սիրիայի տարածքային ամբողջականության և միասնական կառույցի պաշտպանությանը, Էրդողանն ասել է.

«Մենք երբեք չենք նահանջի սրանից։ Անկարան բոլոր անհրաժեշտ աջակցությունը կտրամադրի Սիրիայի ժողովրդին՝ նրանց ձեռքբերումները մշտական ​​դարձնելու համար այն բանից հետո, երբ նրանք հաղթեցին «ճնշող ռեժիմին»», – ասել է Թուրքիայի ղեկավարը։

Նա նաև հայտարարել է , որ  «Սիրիայում ոչ մի ահաբեկչական խմբավորման, տեղ չկա և որ «ահաբեկչական PKK-ն և նրա մասնաճյուղերը կա՛մ կլուծարվեն, կա՛մ կվերացվեն»։

Էրդողանն ասել է, թե Անկարան հաստատակամ է շարունակել իր «հակաահաբեկչական գործողությունները» Սիրիայում  «վիրահատական ​​ճշգրտությամբ՝ ապահովելով, որ ոչ մի վնաս խաղաղ բնակչությանը չլինի»:

Թարգմանությունը՝ Էմմա Չոբանյանի