Հաջողվեց վերականգնել ֆեյսբուքյան էջս. անձնական նամակագրություններից որոշ հատվածներ թիրախային հեռացրել են. Աղազարյան

Հաջողվեց վերականգնել ֆեյսբուքյան էջս. անձնական նամակագրություններից որոշ հատվածներ թիրախային հեռացրել են. Աղազարյան

Երեկ երեկոյան ինձ հաջողվեց վերականգնել իմ ֆեյսբուքյան նախկին էջը, այս մասին ֆեյսբուքի էջում գրել է ՔՊ-ից հեռացված ԱԺ պատգամավոր Հովիկ Աղազարյանը:

Նա, մասնավորապես, գրել է. «Այս կապակցությամբ հայտարարում եմ, որ նկատել եմ կոպիտ միջամտություն, մասնավորապես, անձնական նամակագրություններից որոշ հատվածների թիրախային հեռացում։ Ես կփորձեմ իմ էջում նախկինում հրապարակված երեք պատմվածքները, որոնք մաս են կազմում «Երկրի իրական կողմը» գրքի, վերծանել և վերջ։ Որևէ այլ միջամտություն իմ կողմից չի լինելու»։

ՔՊ-ական նախկին պատգամավոր Հովիկ Աղազարյանի հեռախոսը նախաքննական մարմինն առգրավել է Քննչական կոմիտեի նախկին ղեկավար Արգիշտի Քյարամյանի հետ միջադեպի գործով։ Պատգամավորը Factor TV-ի եթերում հայտարարել էր՝ ինչ-որ պաշտոնյա սպառնացել է իրեն, որ հեռախոսից հայտնաբերված անձնական կյանքի վերաբերյալ տեղեկությունները կհայտնվեն ընտանիքի անդամների ձեռքին, եթե մանդատը վայր չդնի։

«Ինձ հրավիրեցին ուժեղ տղերք, չեմ ասի որտեղից, հրավիրեցին ուժեղ տղերք, քնքշորեն, բանորեն, և այլն, և այլն, պարոն վարչապետի խնդրանքը, ճիշտ չի, դա պետականության, և այլն, և այլն, և այլն, և այլն, և այլն: Ինձ ասում են՝ «դուք օքե՞յ եք, պարոն Աղազարյան, եթե այս ինֆորմացիան ձեր տղաները իմանան», ասում եմ՝ «այո, օքեյ եմ»: «Դուք օքե՞յ եք, պարոն Աղազարյան, որ էս ինֆորմացիան իմանա այ սա», ասում եմ՝ «ոչ, օքեյ չեմ»: «Բա որ իմանա՞»: «Բա որ իմանա, ես էլ ուրիշ բան կասեմ», – պատել էր նա։

Պատգամավորն այդպես էլ չի բացահայտել՝ ովքեր են «ուժեղ տղաները»։ Աղազարյանի խոսքով՝ իր հեռախոսում առկա բովանդակությունը, այդ թվում՝ անձնական, դուրս է եկել Հակակոռուպցիոն կոմիտեից, հասել ԱԱԾ, հետո՝ վարչապետին, վերջում էլ այն վարչության նիստում կիսվել ՔՊ-ականների հետ։

Նշենք, որ Հակակոռուպցիոն կոմիտեում պատգամավոր Հովիկ Աղազարյանի վերաբերյալ քրեական գործ է հարուցվել՝ պետական գաղտնիք պարունակող տեղեկություններ հրապարակելու հոդվածով։ Օրեր առաջ Գլխավոր դատախազությունն էր դիմել Հակակոռուպցիոն կոմիտե, որ ուսումնասիրեն իշխանության ներկայացուցիչների հրապարակումները Հովիկ Աղազարյանի վերաբերյալ այն մասին, թե պետական գաղտնի տեղեկության արտահոսք է պատգամավորը կազմակերպել։ Իշխող «Քաղաքացիական պայմանագիրը» պարզաբանել էր, որ Աղազարյանը հեռացվել է պետական և կուսակցական նշանակության կոնֆիդենցիալ տեղեկատվության արտահոսքերի, ինչպես նաև «հանրության բարոյական նորմերի կոպիտ խախտումների» պատճառներով։

Ավելի վաղ ՀՀ վարչապետ Նիկոլ Փաշինյանը Հանրային հեռուստաընկերությանը տված հարցազրույցի ժամանակ տեղեկացրել էր, որ ՔՊ պատգամավորներ Նարեկ Զեյնալյանին և Հովիկ Աղազարյանին խնդրել է պատգամավորական մանդատները վայր դնել՝ հույս հայտնելով, որ Հովիկ Աղազարյանը կկատարի իր խնդրանքը։ Նոյեմբերի 22-ին Նարեկ Զեյնալյանը ԱԺ էր ներկայացրել մանդատը վայր դնելու դիմումը։ Հովիկ Աղազարյանը մերժել է Փաշինյանի խնդրանքը։

Հիշեցնենք՝ Ազգային ժողովում լսումների ժամանակ Քննչական կոմիտեի՝ այդ ժամանակվա նախագահ Արգիշտի Քյարամյանը հայտարարել էր՝ պատգամավոր Հովիկ Աղազարյանի որդու գործով երկու հոգի միջնորդել է իրեն: Հովիկ Աղազարյանի և Արգիշտի Քյարամյանի միջև տեղի էր ունեցել վեճ, Աղազարյանը պնդել էր, թե Քյարամյանը ստում է: ՀՀ քննչական կոմիտեի նախագահ Արգիշտի Քյարամյանի՝ ԱԺ-ում արած հայտարարությունների մասով Հակակոռուպցիոն կոմիտեում քրեական վարույթ է նախաձեռնվել ՀՀ ՔՕ 486-րդ հոդվածի 1-ին մասով (Արդարադատության իրականացմանը կամ գործի քննությանը միջամտելը): Քյարամյանն ազատվել էր զբաղեցրած պաշտոնից:

Մանյա Պողոսյան