ԱՄՆ-ն ու Ֆրանսիան չեն օգնի Հայաստանին․Ալիևը ՀՀ-ին զենքի մատակարարումները Բաքվի համար «իրական վտանգ» է անվանել

Ֆրանսիայի կողմից  զենքի մատակարարումները Հայաստանին իրական վտանգ են ներկայացնում Ադրբեջանի համար։ Այս մասին ВГТРК-ի ու «Ռիա Նովոստի»-ի հետ հարցազրույցում հայտարարել է Ադրբեջանի նախագահ Իլհամ Ալիևը։

«Այն զենքերը, որոնք Մակրոնի կառավարությունը մատակարարում է Հայաստանին, հարձակողական, մահաբեր զենքեր են, որոնք գործնական վտանգ են ներկայացնում Ադրբեջանի համար»,- ասել է նա՝ նշելով, թե «Ադրբեջանը բազմիցս կոչ է արել  Փարիզին ու Վաշինգտոնին դադարեցնել Հայաստանի ռազմականացումը»։

«Մենք բազմիցս տեղեկացրել ենք Հայաստանին ու նրա հովանավորներին ԱՄՆ Պետդեպարտամենտում, որ դա պետք է դադարեցվի։ Սակայն, ցավոք, մեզ չեն լսել։ Հայաստանի սպառազինման գործընթացը ընթանում է թռիչքաձև»,- դժգոհել է Ալիևը՝ Ադրբեջանի ռազմական բյուջեի մեծացումը կապելով դրա հետ։

«Մենք, բնականաբար, ստիպված ենք համարժեք միջոցներ ձեռնարկել 2025 թվականին մեր հաջորդ ռազմական բյուջեն կլինի ռեկորդային՝ մոտ 5 միլիարդ դոլար»,- նշել է նա։

Ըստ Ալիևի՝ ՀՀ սպառազինման հետևում կանգնած են Ֆրանսիան, Հնդկաստանը և Միացյալ Նահանգները,  պնդելով, թե Վաշինգտոնը չի ընդունում այդ մատակարարումները, թեև Ադրբեջանը հայկական օդանավակայաններում, իբր, արձանագրել է ամերիկյան ռազմատրանսպորտային ինքնաթիռների թռիչքները։

Ադրեջանի նախագահը հայտարարել է, թե Ֆրանսիայի նախագահ Էմանուել Մակրոնի և ԱՄՆ Պետդեպարտամենտի աջակցությունը Երևանին որևէ երաշխիք չի տալիս։

«Այստեղ՝ գետնի վրա, եթե նրանք մտածեն հերթական սադրանքը մեր դեմ, նրանց ոչ ոք չի օգնի։ Ինչպե՞ս է նրանց օգնել Մակրոնը 2020 թ-ին կամ 2023 թ-ին։Աջակցել է, երևի ձեռքն է բռնել, կամ այլ տեղ։ Ինչի է նա ընդունակ, մենք դա շատ լավ գիտենք»,-ասել է Ալիևը՝ նշելով, թե Բաքուն շարունակելու է կոչ անել դադարեցնել զենքի մատակարարումը Հայաստանին։

«Եվ եթե այդպես շարունակվի, ապա մեր դեմ բողոքներ չլինեն »,- սպառնացել է նա։

Շարունակելով դժգոհել ՀՀ-ի կողմից սպառազինությունների ձեռքբերումից՝ Ալիևը հայտարարել է, թե «ՀՀ-ն չի դիմանա սպառազինությունների մրցավազքին»։

«Ես կարծում եմ, որ դա  աղետի տանող ճանապարհ է։ Հայաստանը չի դիմանա մեզ հետ սպառազինությունների մրցավազքին։ Չնայած այն հանգամանքին, որ զենքի մեծ մասը նրանք ստանում են Արևմուտքից անվճար կամ վարկով, որը, բնականաբար, հետո դուրս կգրվի։ Բայց նույնիսկ այդ դեպքում նրանք չեն դիմանա մեզ հետ սպառազինությունների մրցավազքին»,- ասել է Ադրբեջանի նախագահը։

Թարգմանությունը՝ Էմմա Չոբանյանի