«Բաքուն Ղարաբաղի վերականգնման համար սպասում է ռուսական ներդրումների»․ Ալիև

Բաքուն սպասում է ռուսական ներդրումների Ղարաբաղի  վերականգնման համար և ուրախ կլինի ռուսական ընկերությունների ժամանմանը։ Այս մասին հայտարարել է Ադրբեջանի նախագահ Իլհամ Ալիևը Ռիա Նովոստիին տված հարցազրույցում։

«Առաջին ներդրումային ծրագիրը իրականացվել է Թաթարստանի կողմից։ Դա «ԿԱՄԱԶ»-ի սպասարկման կենտրոնն է Ջաբրայիլի շրջանում, որը բացվել է իմ ու Թաթարստանի ղեկավարի կողմից։ Դա առաջին ներդրումային ծրագիրն էր, առաջին օտարերկրյա ներդրումը այսինքն ռուսական էր։ Այնպես, որ և սպասում ենք ներդրումների, և՛ կապալառուներին էլ ուրախ կլինենք»,-ասել է Ալիևը՝ նշելով, որ Թաթարստանի պատվիրակությունը գտնվում է Բաքվում, և  մտադիր է հանդիպում անցկացնել հանրապետության ղեկավար Ռուստամ Միննիխանովի հետ։ Ալիևի ու Միննիխանովի հանդիպումը նախօրեին արդեն տեղի է ունեցել։

Ադրբեջանի նախագահը նաև հայտարարել է, որ Բաքուն նախատեսում է  հետագայում էլ ռուսական զենք գնել, սակայն այդ գործընթացը  դադարեցված է օբյեկտիվ պատճառներով։

«Այո՛, ծրագրում եք, բայց պետք է ասեմ, որ վերջին առնվազն երեք տարիների ընթացքում ռուսական զենքի գնման նոր պայմանագրեր չեն կնքվել»,- ասել է նա։

Ալիևի խոսքով՝ նոր պայմանագրերի ժամանակավոր բացակայությունը բացատրվում է ռուսական ռազմարդյունաբերական համալիրի աշխատանքով «ներքին սպառման  համար»։ Նա նշել է, որ  Բաքուն փոխել է Ռուսաստանի Դաշնության հետ ռազմական պայմանագրերի կատարման ժամկետները, որոնք կնքվել են դեռևս չորս տարի առաջ։ Միաժամանակ Ալիևը, ընդգծել է,  որ պաշտպանական պայմանագրերի կատարումը դիտարկում է որպես «ժամանակավորապես կասեցված օբյեկտիվ պատճառներով»։

Նա նաև հայտնել է, որ Ադրբեջանը ուշադրությամբ հետևում է ռուսական պաշտպանական արդյունաբերության վերջին զարգացումներին և վերջերս նոր հարցումներ է ուղարկել ռուսական ռազմական արտադրանքի գնման համար։

Թարգմանությունը՝ Էմմա Չոբանյանի