20.02.2026 | 22:16
Թուրքիան եվրոպացի 6 ակտիվիստների է ձերբակալել քաղբանտարկյալներին այցելելուց հետո․ նրանք կարտաքսվեն
Ադրբեջանում ԱՄՆ դեսպանը հերքել է Վաշինգտոնի հասցեին Բաքվի մեղադրանքները
Քաղաքականություն
16.12.2024 | 22:22
Բաքվում ԱՄՆ դեսպան Մարկ Լիբբին հերքել է Ադրբեջանի պաշտոնյաների մեղադրանքները Բաքվի նկատմամբ Վաշինգտոնի ոչ բարեկամական քաղաքականության վերաբերյալ։ Ադրբեջանական լրատվամիջոցների հաղորդմամբ՝ Ամերիկյան Առևտրի պալատի (AmCham) կազմակերպած հանդիպմանն ունեցած ելույթում նա բարձր է գնահատել երկու երկրների միջև համագործակցությունը Ադրբեջանի անկախության տարիներին և նշել ապագայի մեծ ներուժը։
«Ադրբեջանն ունի շահավետ աշխարհագրական դիրք՝ դառնալու տարածաշրջանային տրանսպորտային և նյութատեխնիկական ապահովման անփոխարինելի կենտրոն։ Մենք նախատեսում ենք ավելի շատ առևտրային առաքելություններ ներգրավել հատկապես այս ոլորտներում՝ աջակցելու Ադրբեջանի բարգավաճման հաջորդ փուլի զարգացմանը»,- նշել է դեսպանը։
Նա հավելել է, որ հաշվի առնելով Ադրբեջանի օդատիեզերական ոլորտում աճի ներուժը, կիբերանվտանգության փորձը և թվային ենթակառուցվածքը՝ նորարար ամերիկյան ընկերությունները կարող են նշանակալի դեր խաղալ:
«Անդրադառնալով վերջին մեկ տարվա ընթացքում ԱՄՆ-Ադրբեջան համագործակցության հաջողություններին՝ ես հիշում եմ կասկածի ցինիկ ձայները։ Բազմաթիվ մեղադրանքներ են հնչել Միացյալ Նահանգների հասցեին Ադրբեջանին տապալելու վայրի և անիմաստ դավադրությունների մեջ։ Ի պատասխան նման ապատեղեկատվության՝ ես ոչ միայն կմատնանշեի անցած տարվա հաջողությունները, այլև կհիշեցնեի բոլորին վերջին մի քանի տասնամյակների ընթացքում մեր գործընկերության ուժի մասին։ Այս տարի մենք նշեցինք «Դարի պայմանագրի» 30-ամյակը։ Այս հանգրվանը մեզ հիշեցնում է, թե ինչպես Ադրբեջանի ղեկավարությունն ու նախաձեռնությունը ԱՄՆ ներդրումների և քաղաքական աջակցության հետ միասին փոխեցին պատմության ընթացքը»,- հայտարարել է Լիբբին։
Թարգմանությունը՝ Էմմա Չոբանյանի
