Վրաստանում նախագահական ընտրություններ են․ ընդդիմությունը հավաքվել է ԱԺ-ի մոտ

Վրաստանի խորհրդարանի շենքում նախագահական ընտրություններ են ընթանում, որոնց լեգիտիմությունը չեն ճանաչում գործող նախագահ Սալոմե Զուրաբիշվիլին և ընդդիմադիր կուսակցությունները․ գրում է ekhokavkaza-ն։

Վրաստանի պատմության մեջ առաջին անգամ նախագահին ընտրում է ոչ թե բնակչությունը, այլ ընտրական կոլեգիան։ Պետության ղեկավարի պաշտոնի միակ թեկնածուն ֆուտբոլի վետերան Միխեիլ Կավելաշվիլին է։ Նրա թեկնածությունը դրել է  միլիարդատեր Բիձինա Իվանիշվիլին։

Վրաստանի խորհրդարանի շենքի մոտ հավաքվել են «Վրացական երազանքի» հակառակորդները։

Նշվում է, որ Վրաստանի խորհրդարանն այսօր գործում է անվտանգության դեղին մակարդակով՝ այցելուների մուտքը սահմանափակ է։

«Միջոցառման նպատակը Վրաստանի խորհրդարանի պալատում աշխատանքային և անվտանգ միջավայրի ապահովումն է»,- ասված է խորհրդարանի մամուլի ծառայության հաղորդագրության մեջ։

Շենքի մուտքը թույլատրվում է միայն ընտրական կոլեգիայի անդամներին և «համապատասխան կառուցվածքային ստորաբաժանումների կողմից հրավիրված» անձանց։

Թբիլիսիի քաղաքապետ, «Վրացական երազանքի» գլխավոր քարտուղար Կախա Կալաձեն ներողություն է խնդրել քաղաքացիներից հինգ տարի առաջ երկրի նախագահի պաշտոնում Սալոմե Զուրաբիշվիլիին նշանակելու համար։

«Ես ուզում եմ ներողություն խնդրել մեր բնակչությանից։ Ես երբեք չեմ խոսել այս մասին և հիմա թույլ տվեք ներողություն խնդրել բնակչությանից այն բանի համար, որ այս կինը «Վրացական երազանքի» ջանքերի շնորհիվ հայտնվեց այնտեղ, որտեղ գտնվում է այսօր։ Նա դաժանորեն ծառայել և ծառայում է ոչ թե Վրաստանին, այլ արտաքին ուժերին»,- ֆեյսբուքյան ուղիղ եթերում ասել է Կալաձեն։

«Փառք Աստծո, որ 2025 թվականին ոչ թե նա, այլ նոր նախագահը կշնորհավորի Վրաստանի ժողովրդին»,- հավելել է նա։

Վրաստանի նախագահ Սալոմե Զուրաբիշվիլին աշխատանքի գնալիս կանգ է առել խորհրդարանի մոտ․ գրում է newsgeorgia.ge-ն։

Անվտանգության մի քանի աշխատակիցների ուղեկցությամբ Զուրաբիշվիլին Ազատության հրապարակից քայլել է դեպի Քաշվեթի եկեղեցի: Նրան շրջապատել են տասնյակ լրագրողներ։ Ցուցարարները նախագահին ողջունել են «Սալոմե», «Մենք քեզ սիրում ենք», «Կավելաշվիլին մեր նախագահը չի լինի» վանկարկումներով։

Նյութը պատրաստեց Անահիտ Խաչատրյանը