Թրամփը համաձայն չէ «հարյուրավոր մղոններ Ռուսաստանի խորքերի» ուղղությամբ հրթիռներ արձակելուն

ԱՄՆ նորընտիր նախագահ Դոնալդ Թրամփը քննադատել է Կիևին՝ նոյեմբերին Ռուսաստանի տարածքի վրա ամերիկյան հրթիռներ արձակելու համար, գրում է Time-ը, որը Թրամփին տարվա մարդ է ճանաչել։

Խոսքը ATACMS հեռահար հրթիռների մասին է։

«Ես կտրականապես համաձայն չեմ Ռուսաստանի տարածք հարյուրավոր մղոններ խորությամբ հրթիռներ արձակելու հետ: Ինչո՞ւ ենք մենք դա անում։ Մենք պարզապես սրում ենք այս պատերազմը և ավելի ենք խորացնում այն»,- ասել է նա ամսագրին տված հարցազրույցում։

Հարցին՝ արդյո՞ք նա կհրաժարվի Ուկրաինային աջակցությունից, Թրամփը պատասխանել է, որ կօգտագործի Կիևին ԱՄՆ-ի աջակցությունը որպես Ռուսաստանի դեմ ճնշման լծակ պատերազմը դադարեցնելու բանակցություններում:

«Ես ցանկանում եմ համաձայնության գալ, և համաձայնության հասնելու միակ ճանապարհը [Ուկրաինայից] չհրաժարվելն է։ Կարծում եմ, որ հիմա ամենավտանգավորն այն է, ինչ տեղի է ունենում, երբ Զելենսկին որոշեց, կարծում եմ՝ [ԱՄՆ] նախագահի հավանությամբ, սկսել հրթիռներ արձակել Ռուսաստանի ուղղությամբ։ Կարծում եմ՝ սա լուրջ էսկալացիա է։ Ես կարծում եմ, որ դա հիմար որոշում է»,- ասել է Թրամփը։

Հիշեցնենք, որ Մոսկվան նոյեմբերին հայտարարել էր Ուկրաինայի կողմից ռազմական օբյեկտներին հարվածելու համար ATACMS-ի օգտագործման մասին: Կրեմլը նոր «Օրեշնիկ» հրթիռով ցուցադրական պատասխան հարված հասցրեց Դնեպրին։ Նախօրեին՝ դեկտեմբերի 11-ին, ՌԴ պաշտպանության նախարարությունը հայտնել է 6 ATACMS հրթիռներով Տագանրոգի ռազմական օդանավակայանի վրա նոր հարձակման մասին։

Թարգմանությունը՝ Տաթև Ֆռանգյանի