Հարավային Կորեայի ՊՆ նախկին ղեկավարը փորձել է ինքնասպան լինել. նախագահի աշխատակազմում խուզարկություններ են

Հարավային Կորեայի պաշտպանության նախկին նախարար Կիմ Յոն Հյունը փորձել է ինքնասպանություն գործել Արևելյան Սեուլում գտնվող կալանավայրում, հայտնել է հաստատության ղեկավար Շին Յոն Հեն, փոխանցում է BBC-ի ռուսական ծառայությունը։

Ըստ պաշտոնյայի՝ այժմ նախկին նախարարի վիճակը մտահոգություն չի առաջացնում։ Նրա խոսքով՝ իրավիճակին անհապաղ միջամտել է քննչական մեկուսարանի աշխատակիցը, և Կիմ Յոնգ Հյունն «անմիջապես հրաժարվել է ինքնասպանության փորձից»:

«Բուժզննման արդյունքները ցույց են տալիս, որ բանտարկյալի առողջական վիճակը լավ է, առանց որևէ շեղումների»,- ասվում է Հարավային Կորեայի Արդարադատության նախարարության հայտարարության մեջ, որը մեջբերում է AFP-ն:

Միջադեպը տեղի է ունեցել երեքշաբթի երեկոյան, երբ Սեուլի դատարանը պաշտոնապես ձերբակալել է նախկին նախարարին՝ ապստամբությանը մասնակցության մեղադրանքով: Հետաքննության տվյալներով՝ Կիմ Յոնգ Հյուն է առաջարկել Հարավային Կորեայի նախագահ Յուն Սոկ Յոլին երկրում ռազմական դրություն հայտարարել և հրամայել է զինվորականների տեղակայել Ազգային ժողովի շենքում։

Յուն Սոկ Յոլը դեկտեմբերի 3-ի ուշ երեկոյան երկրում ռազմական դրություն հայտարարեց: Խորհրդարանն արգելափակեց այս որոշումը, որից հետո նախագահը ստիպված եղավ չեղարկել այն։ Դրանից հետո ՊՆ ղեկավարը հրաժարական տվեց,  հետաքննություն սկսվեց։

Գործով ներգրավված է նաև ինքը՝ նախագահը, որին արգելվում է լքել երկիրը։ Չորեքշաբթի օոստիկանները ներխուժել են նրա գրասենյակ։

Անցյալ կիրակի ձերբակալված Կիմ Յոնգ Հյունը երեքշաբթի ներողություն է խնդրել փաստաբանների միջոցով՝ ասելով, որ «այս իրավիճակի ամբողջ պատասխանատվությունը բացառապես» իր վրա է: Նա ներողություն է խնդրել հարավկորեացի ժողովրդից և ասել, որ իր ենթակաները «կատարել են իր հրամանները»:

Բացի նախագահի գրասենյակից՝ հարավկորեական ոստիկանությունը ներխուժել է նաև Սեուլի ոստիկանության բաժիններ և խորհրդարանի շենքը պահպանելու համար պատասխանատու ստորաբաժանման գրասենյակ։ Երկրի նախագահը խուզարկություններին ներկա չի եղել, սակայն նրա անունը որպես կասկածյալ նշված է եղել խուզարկության հրամանում:

Թարգմանությունը՝ Տաթև Ֆռանգյանի