23.02.2026 | 10:00
Արտարժույթների փոխարժեքները՝ փետրվարի 23-ի դրությամբ
Էրդողանը հայտարարել է, թե «Հալեպը, Համան, Դամասկոսն անցան իրենց իսկական տերերի վերահսկողության տակ»
Քաղաքականություն
10.12.2024 | 13:21
Թուրքիայի նախագահ Ռեջեփ Թայիփ Էրդողանը հայտարարել է, որ հարևան Սիրիայում 13 տարի շարունակվող քաղաքացիական պատերազմը երեկվանից նոր հարթություն է ստացել։
«Մինչ Հալեպը, Համան, Հոմսը և վերջապես Դամասկոսն անցան իրենց իսկական տերերի վերահսկողության տակ, Բաասի բռնապետությունը, որը գոյատևեց արյունահեղության, ճնշումների և բռնակալության միջոցով 61 տարի, ամբողջովին փլուզվեց: Մենք ուրախ ենք, որ Թալ Ռիֆաթն ու Մանբիջը, որոնք տարիներ շարունակ մնացել էին անջատողական կազմակերպության օկուպացիայի տակ՝ չնայած տրված խոստումներին, այժմ մաքրվել են ահաբեկիչներից։ Այնուամենայնիվ, այն փաստը, որ հին ռեժիմը որոշ քաղաքներ թողել է անջատողական ահաբեկչական կազմակերպության սիրիական ընդարձակման վերահսկողությանը, մեկ անգամ ցույց տվեց նրանց միջև կեղտոտ դաշինքը»,- ասել է Էրդողանը։
Նա նշել է, թե Ասադի ռեժիմը երբեք չի հրաժարվել «հակաթուրքական» դիրքորոշումից։
«Սիրիայի վերաբերյալ մեր զգայունությունը երբեք չի առաջնորդվել սեփական շահերով։ Մենք խնդրին միշտ մոտեցել ենք խղճի և ողորմածության տեսանկյունից և միշտ գործել ենք մարդասիրական մտահոգություններով։ Եվս մեկ անգամ շեշտեմ, որ սիրիացի ժողովուրդը մեր եղբայրներն ու քույրերն են։ Ո՞վ կարող էր ակնկալել, որ մենք երես կթեքենք մեր հարևաններից, որոնց հետ 910 կիլոմետրանոց սահման ունենք։ Մեր սրտի կեսը գտնվում է Գազիանթեփում, Հաթայում, Շանլըուրֆայում, իսկ մյուս կեսը՝ Աֆրինում, Հալեպում, Համայում, Հոմսում և Դամասկոսում։ Թուրքիան աչք չունի այլ երկրի տարածքի վրա։ Մեր անդրսահմանային գործողությունների միակ նպատակը մեր հայրենիքն ու մեր քաղաքացիներին ահաբեկչական հարձակումներից պաշտպանելն է»,- հայտարարել է Թուրքիայի նախագահը։
Թարգմանությունը՝ Էմմա Չոբանյանի
