ԱՄՆ կօգնի պատասխանատվության ենթարկել Բաշար Ասադին օգնածներին․ Բլինքեն

Միացյալ Նահանգները կաջակցի միջազգային ջանքերին, որոնց նպատակն է պատասխանատվության ենթարկել նրանց, ովքեր օգնել են Սիրիայի նախագահ Բաշար Ասադին, ինչպես նաև կառավարության ազդեցիկ պաշտոնյաներին, ովքեր աշխատել են նախորդ իշխանությունների օրոք, հայտարարել է ԱՄՆ պետքարտուղար Էնթոնի Բլինքենը:

Ավելի վաղ ԱՄՆ նախագահ Ջո Բայդենը խոսել էր Ասադին պատասխանատվության ենթարկելու անհրաժեշտության մասին։

«Մենք կաջակցենք Ասադի ռեժիմին և նրա կողմնակիցներին պատասխանատվության ենթարկելու միջազգային ջանքերին՝ սիրիացի ժողովրդի դեմ կատարված վայրագությունների և հանցագործությունների համար, ներառյալ՝ քիմիական զենքի կիրառումը»,- ասվում է Բլինքենի հայտարարության մեջ:

Ամերիկյան դիվանագիտության ղեկավարը հավելել է, որ Վաշինգտոնն «ի գիտություն է ընդունել» զինված ընդդիմության առաջնորդների բոլոր վերջին հայտարարությունները, սակայն Բլինքենը խոստացել է գնահատել դրանք այն բանից հետո, երբ ընդդիմությունն «ավելի մեծ պատասխանատվություն վերցնի» կոնկրետ գործողություններում։

«Մենք կրկին կոչ ենք անում կողմերին՝ հարգել մարդու իրավունքները, ձեռնարկել բոլոր նախազգուշական միջոցները խաղաղ բնակիչներին պաշտպանելու համար և պահպանել միջազգային մարդասիրական իրավունքը»,- ասվում է Պետքարտուղարության մեկնաբանության մեջ:

Դեկտեմբերի 8-ին հակակառավարական զորքերը գրավել են Սիրիայի մայրաքաղաք Դամասկոսը։ Բաշար Ասադը հրաժարական է տվել և լքել երկիրը։ Նա ապաստան է ստացել Ռուսաստանում։ Սիրիայի վարչապետ Մուհամմեդ Ղազի ալ-Ջալալին հայտարարել է իսլամիստների հետ բանակցությունների և իշխանության խաղաղ փոխանցում կազմակերպելու մտադրության մասին։

Թարգմանությունը՝ Տաթև Ֆռանգյանի