Նախատոնական տրամադրություն չկա, անտարբերության մթնոլորտում ոտքի հետ գնում ենք. Եղիշե Պետրոսյան. ՏԵՍԱՆՅՈՒԹ

«Ինձ մոտ նախատոնական տրամադրություն չկա, անընդհատ մտածում եմ մեր անվտանգային համակարգի մասին: Վարչապետի կողմից ամեն օր մի նոր խոսույթ է ներմուծվում, որը տակնուվրա է անում մարդկանց միտքը»,- Factor TV-ի հետ զրույցում նշում է երաժիշտ, երգահան Եղիշե Պետրոսյանը:

Նրա խոսքով` մենք ամեն օր մի նոր արտաքին ու ներքին մարտահրավերի առջև ենք կանգնում, սակայն դասեր այդպես էլ չենք քաղում. «Մեր ներքին մեծագույն մարտահրավերը ժողովրդի անտարբերությունն է երկրի ապագայի նկատմամբ, այդ անտարբերության և անպատասխանատվության մթնոլորտում ոտքի հետ գնում ենք»:

Հարցին, թե մեր երկրի համար որոնք են 2024-ի մեծագույն ձեռքբերումն ու կորուստը, Եղիշե Պետրոսյանը պատասխանում է. «2020-ից սկսած մենք դեռ միայն կորցնում ենք, հիմա էլ ինքնության կորստի վտանգի տակ ենք: Բացի նահանջից ու գլխիկոր ընթացքից ուրիշ բան չեմ տեսնում»:

Ինչ վերաբերում է հանրային տրամադրություններին, Եղիշե Պետրոսյանը կարծում է, որ համերաշխության մենք այդպես էլ չհասանք, փոխարենը ավելի են խորանում պառակտումները. «Մեր ժողովրդի մոտ համախմբվելու պոտենցիալը չի մարել, բայց գենարատորը չկա: Մեր արժեհամակարգում տեղաշարժեր լինում են, բայց բացասական: Հանրությանը կոնսոլիդացնող իշխանություն չկա, պառակտող իշխանություն է, 6 տարի է` ժողովրդին նախկիններով կերակրելով իշխանություն է պահում»:

Երաժիշտն անդրադառնում է նաև Հայաստանի պետական օրհներգը խմբագրելու նախաձեռնությանը և վարչապետ Նիկոլ Փաշինյանի այն հայտարարությանը, թե իր մասնակցությամբ բոլոր միջոցառումներին ՀՀ օրհներգը հնչելու է կենդանի կատարմամբ. «Ինձ մոտ ժպիտ է առաջանում այդ նախաձեռնության հետ կապված: Օրհներգի կենդանի կատարումը մեծ ծախսերի հետ է կապված, դա չմտածված թիթիզ արտահայտություն է, արդեն չափն անցավ, դա չտրամաբանված ֆրազա է»:

Երգահանը, որը «Արձագանք» ստուդիայի համահիմնադիրն է, խոսում է նաև հայկական շոուբիզնեսի ներկայիս վիճակի մասին. «90-ականներին մենք ստեղծեցինք գործիքավորողների, ձայնագրողների, համերգներ սպասարկողների, արտիստների դպրոց, մթնոլորտ փոխեցինք, բայց ռաբիսն էլի իր դիրքերում է, փողն այդտեղ է, և շատերը, գայթակղվելով քեֆերի երաժշտությամբ, այսօր լուրջ գործեր չեն ստեղծում»:

Մանրամասները` տեսանյութում:

Աննա Բաբաջանյան