16.12.2025 | 13:20
Թրամփը դատի է տվել BBC-ին` պահանջելով 5 մլրդ դոլար
Դոնալդ Թրամփը կմասնակցի Փարիզի Աստվածամոր տաճարի վերաբացմանը
Քաղաքականություն
07.12.2024 | 15:26
Փարիզում այսօր կկայանա Աստվածամոր տաճարի վերաբացման արարողությունը․ գրում է DW-ի ռուսական ծառայությունը։
Արարողության սպասված հյուրերի թվում են ԱՄՆ նորընտիր նախագահ Դոնալդ Թրամփը, ինչպես նաև այլ պետությունների ղեկավարներ։
Ավելի վաղ տեղեկացրել էինք, որ ՀՀ վարչապետ Նիկոլ Փաշինյանն այսօր՝ Սպիտակի երկրաշարժի 36-րդ տարլիցի օրը, Վանաձոր, Սպիտակ ու Գյումրի այցելելուց ու երկրաշարժի զոհերի հիշատակին կառուցված հուշակոթողների մոտ հարգանքի տուրք մատուցելուց հետո, տիկնոջ՝ Աննա Հակոբյանի հետ, մեկնել է Փարիզ՝ մասնակցելու Աստվածամոր տաճարարի վերաբացմանը։
Լրատվամիջոցի փոխանցմամբ՝ մինչ տաճարի բացումը Ֆրանսիայի նախագահ Էմանուել Մակրոնը նախ կընդունի ԱՄՆ նորընտիր նախագահ Թրամփին (նախատեսված է տեղական ժամանակով ժամը 16։00-ին), ապա Ուկրաինայի նախագահ Զելենսկիին (ժամը 17։00-ին)։
Ուկրաինական անանուն աղբյուրը AFP-ին ասել է, որ «հնարավոր է» Զելենսկու և Թրամփի միջև զրույցը:
Նշվում է, որ ԱՄՆ նախագահ Ջո Բայդենի հեռացող վարչակազմը կներկայացնի նրա կինը՝ Ջիլը։
Հիշեցնենք, որ Ֆրանսիայի մայրաքաղաք Փարիզի գլխավոր խորհրդանիշներից մեկում՝ գոթական Աստվածամոր տաճարում, հրդեհ էր բռնկվել 2019 թվականի ապրիլի 15-ին։ Տաճարի թաղածածկ առաստաղի մասերն ավերվել էին, 19-րդ դարի գագաթը փլվել էր, իսկ տաճարը մեծ վնաս էր կրել։
Հրդեհի գիշերն իսկ Էմանուել Մակրոնը խոստացել էր, որ Աստվածամոր տաճարը կվերականգնվի հինգ տարվա ընթացքում և կդառնա «ավելի գեղեցիկ, քան երբևէ»։
