17.05.2026 | 23:35
Հենրիխ Մխիթարյանը՝ «Ինտեր» – «Վերոնա» հանդիպման լավագույն ֆուտբոլիստ․ ՏԵՍԱՆՅՈՒԹ
Այրվում է Փարիզի Աստվածամոր տաճարը․ ՈՒՂԻՂ
Տեսանյութեր
15.04.2019 | 21:58
Խոշոր հրդեհ է բռնկվել Փարիզի Սուրբ Աստվածամոր տաճարում՝ Նոտր Դամում: Այս պահի դրությամբ արդեն իսկ հրդեհը ոչնչացրել է տաճարի ետնամասի գրեթե ողջ տանիքը։
Աշխարհի ամենահայտնի տաճարներից մեկը, որը հանդիսանում է Փարիզի խորհրդանիշը, 2013 թվականին նշեց իր 850 ամյակը։ Տաճարի հրատապ ռեստավրացիայի անհրաժեշտության մասին անցած տարի բարձրաձայնեց Ֆրանսիայի կաթոլիկ եկեղեցին՝ դիմելով իշխանություններին միջոցնել հատկացնել տաճարի վերանորոգման համար, քանի որ այն արդեն փլուզման վտանգի առաջ էր կանգնած։
Ներկայումս տաճարում իրականացվում էին վերակառուցման աշխատանքներ։
Այս պահին մեծ թվով հրշեջ ուժեր են աշխատում, տաճարի հարեւանությամբ տարածքն ամբողջովին ազատված է, սակայն դատելով հրդեհի մասշտաբներից, արդեն իսկ հնչում են հոռետեսական կանխատեսումներ, որ հրդեհը, ըստ ամենայնի, կոչնչացնի Ֆրանսիայի այս ամենասիրված մշակութային կոթողներից մեկը։ Կադրերում երեւում է, որ հրշեջներին հաջողվել է բարձրանալ տաճարի կամարներից մեկի վրա եւ իրականացնել հրդեհաշիջման աշխատանքներ, սակայն կրակի տարածումը չափազանց մեծ է։
Փարիզի Աստվածամոր տաճարը սկսել են կառուցել 1163 թվին՝ Սուրբ Ստեփանոսի բազիլիկ եկեղեցու տեղում, որն իր հերթին հիմնվել էր հեթանոսական Յուպիտերին նվիրված տաճարի վրա։ Կառուցումը տևել է մոտ 200 տարի։ Տաճարի մուտքային մասը բաղկացած է երեք կամարներից։
Հարյուրավոր փարիզեցիներ տաճարի հարեւանությամբ հավաքված հետեւում են հրդեհաշիջման աշխատանքներին, նրանցից ոմանք արտասվում են՝ այդ անդառնալի կորստի գիտակցումից։
Թե որն է հրդեհի պատճառը՝ այս պահին հայտնի չէ։
Քիչ առաջ ֆրանսիական լրատվամիջոցները հաղորդեցին, որ հատուկ հայտարարությամբ հանդես կգա Ֆրանսիայի նախագահ Էմանուել Մակրոնը։
