Քաղաքականություն
06.12.2024 | 15:09
Ադրբեջանի ԱԳ փոխնախարար Էլնուր Մամեդովը Բաքվում ԱՄՆ պետքարտուղարի Եվրոպայի և Եվրասիայի հարցերով օգնականի տեղակալ Ջոշուա Հաքի գլխավորած պատվիրակության հետ հանդիպմանը քննարկել է երկու երկրների միջև երկկողմ և բազմակողմ համագործակցության հարցեր, ինչպես նաև Ադրբեջանի և Հայաստանի միջև հարաբերությունների կարգավորման գործընթացի հեռանկարները։
Ադրբեջանցի պաշտոնյան ամերիկյան կողմին տեղեկացրել է հետհակամարտային շրջանում տարածաշրջանում տիրող իրավիճակի, Ադրբեջանի և Հայաստանի միջև խաղաղության համաձայնագրի շուրջ բանակցությունների մասին։
«Հանդիպմանը ևս մեկ անգամ նշվել է, որ չնայած խաղաղության համաձայնագրի շուրջ բանակցություններում արձանագրված զգալի առաջընթացին՝ Ադրբեջանի տարածքային ամբողջականության և ինքնիշխանության դեմ շարունակվող պահանջներ կան Հայաստանի Սահմանադրությամբ, օրենսդրական ակտերում, ինչպես նաև հայցեր միջազգային կազմակերպություններում և դատարաններում։ Ընդգծվել է այդ պահանջներից հրաժարվելու կարևորությունը»,- ասվում է հայտարարության մեջ։
Հանդիպման ընթացքում մտքեր են փոխանակվել երկկողմ հետաքրքրություն ներկայացնող և տարածաշրջանային հարցերի շուրջ։
Թարգմանությունը՝ Էմմա Չոբանյանի
