10.08.2026 | 22:44
Հայաստանի մի շարք հասցեներում էլեկտրաէներգիայի անջատումներ կլինեն
Թուրքիայի, Իրանի և ՌԴ-ի ԱԳ նախարարները կհանդիպեն Դոհայում՝ քննարկելու Սիրիայում զարգացումները
Քաղաքականություն
06.12.2024 | 16:44
Թուրքիայի, Իրանի և Ռուսաստանի արտաքին գործերի նախարարներ Հաքան Ֆիդանը, Աբբաս Արաղչին ու Սերգեյ Լավրովը դեկտեմբերի 7-ին կհանդիպեն Դոհայում՝ քննարկելու Սիրիայում ապստամբների կայծակնային առաջխաղացումը։ Այս մասին հայտնել է թուրքական դիվանագիտական աղբյուրը, գրում է Reuters-ը։
Սիրիացի ապստամբները մարտադաշտում իրենց ամենամեծ ձեռքբերումներն են գրանցել 13 տարի առաջ քաղաքացիական պատերազմի սկսվելուց ի վեր՝ ջախջախիչ հարված հասցնելով նախագահ Բաշար ալ-Ասադի զորքերին:
Ապստամբներն անցյալ շաբաթ գրավել են Հալեպ քաղաքը, այնուհետև Համան։
Թուրքիան, Ռուսաստանը և Իրանը պարբերաբար բանակցություններ են վարում Սիրիայի ապագայի վերաբերյալ եռակողմ ձևաչափով, որը հայտնի է որպես Աստանայի խաղաղ գործընթացի մաս: Մինչ Թուրքիան աջակցում է քաղաքական ու զինված ընդդիմությանը, Իրանն ու ՌԴ-ն սատարում են՝ Ասադին։
Երկուշաբթի Թուրքիայի արտգործնախարար Հաքան Ֆիդանը Անկարայում իրանցի գործընկեր Աբբաս Արաղչիի հետ բանակցություններից հետո մամուլի ասուլիսում ասել էր, որ նոր ջանքեր կգործադրվեն Աստանայի գործընթացը վերակենդանացնելու համար։
Հակամարտությունը վերսկսվելուց ի վեր Անկարան Ասադին կոչ է արել համագործակցել սիրիացի ժողովրդի հետ քաղաքական լուծման համար՝ հերքելով իր մասնակցությունն ապստամբների գործողություններին։
Թարգմանությունը՝ Էմմա Չոբանյանի
