Թուրքիայի ԱԽ-ն հույս է հայտնել, որ Ադրբեջանի ու Հայաստանի միջև բանակցություններում դրական զարգացումերը կհանգեցնեն խաղաղության պայմանագրի կնքմանը

Անկարայի նախագահական համալիրում Թուրքիայի նախագահ Ռեջեփ Թայիփ Էրդողանի գլխավորությամբ նախօրեին տեղի ունեցած Ազգային անվտանգության խորհրդի նիստում քննարկվել է նաև Հայաստան-Ադրբեջան կարգավորման գործընթացը։ Նիստի արդյունքներով պաշտոնական հայտարարություն է տարածվել։

«Մեր ակնկալիքն ու հույսն է, որ Ադրբեջանի ու Հայաստանի միջև բանակցություններում դրական զարգացումերը կհանգեցնեն խաղաղության պայմանագրի կնքմանը, նաև նշվել է, որ  տևական խաղաղությունը կբխի մեր տարածաշրջանի բոլոր դերակատարների շահերից»,-ասվում է հայտարարության մեջ։

Խորհրդին զեկուցվել է իրականացված գործողությունների մասին, ներառյալ «ահաբեկչական PKK/KCK-PYD/YPG, FETO և DAESH ահաբեկչական կազմակերպությունների դեմ», ինչպես նաև վերջին միջազգային զարգացումները:

Ընդգծվել է, որ Թուրքիան կպահպանի իր դիրքորոշումը «Պաղեստինի հարցի արդար և տևական լուծման համար»։ Նշվել է, որ Սիրիայում վերջին զարգացումները ևս մեկ անգամ ընդգծում են քաղաքացիական բնակչության պաշտպանելու համար անհրաժեշտ միջոցների ձեռնարկման կարևորությունը, և որ «ռեժիմը պետք է հաշտվի սեփական ժողովրդի և օրինական ընդդիմության հետ»։ Ընդգծվել է, որ Անկարան հետևողականորեն աջակցել է Սիրիայի տարածքային ամբողջականության և միասնության պաշտպանությանը և պատրաստ է ներդնել անհրաժեշտ բոլոր ռեսուրսները այդ նպատակով և որ անկայունության մթնոլորտը շահարկել փորձող «ահաբեկչական կազմակերպությունները չեն հանդուրժվի»։

Թուրքիայի ԱԽ նիստում քննարկվել է նաև Ուկրաինայի պատերազմի հետ կապված վերջին իրավիճակը, գնահատվել է միջազգային զարգացումների հնարավոր ազդեցությունը հակամարտության ընթացքի վրա։ Ընդգծվել է պատերազմի սրումը կանխելու, հրադադարի անհապաղ ձեռքբերման, արդար խաղաղության հաստատման կարևորությունը։

Թարգմանությունը՝ Էմմա Չոբանյանի