Սիրիայի թուրքամետ խմբավորումները հայտարարել են, որ սկսել են մտնել Համա

Սիրիացի ապստամբները, որոնք վայելում են Անկարայի աջակցությունը, հայտարարել են, որ հարձակում են սկսել Համայի վրա՝ Սիրիայի խոշոր քաղաքի, որտեղ կառավարական ուժերը փորձում են կանխել զինյալների հերթական հաղթանակը և կասեցնել նրանց արագ առաջխաղացումը, գրում է Reuters-ը։

Մասնավորապես, ապստամբների հրամանատար Հասան Աբդուլ Գանին սոցցանցերում գրառում է կատարել՝ հայտնելով, որ սկսել են ներթափանցել Համա։ Սիրիական  պետական ​​լրատվամիջոցներն ավելի վաղ հայտնել էին, որ կառավարամետ ուժերը հետ են մղել հարձակումը։

Երեքշաբթի օրվանից ապստամբները պայքարում են Համա մտնելու համար, և գիշերը  կողմերի հաղորդմամբ՝ ծանր մարտեր են տեղի ունեցել սիրիական բանակի և դաշնակից Իրանի կողմից աջակցվող զինյալների հետ, որոնց աջակցում է ռուսական ռմբակոծությունները։

Անցյալ շաբաթ զինյալները  գրավել են Հալեպ քաղաքը և դրանից հետո Սիրիայի հյուսիս-արևմուտքում գտնվող իրենց անկլավից դեպի հարավ շարժվել՝ երեքշաբթի հասնելով Համայի հյուսիսում գտնվող ռազմավարական բարձունքներին և չորեքշաբթի առաջ շարժվելով դեպի քաղաքի արևելյան և արևմտյան կողմերը:

Համան Սիրիայի կառավարության ձեռքում է եղել քաղաքացիական պատերազմի ամբողջ ընթացքում։ Քաղաքը գտնվում է Հալեպից Դամասկոս ճանապարհին և դրա գրավումը ճանապարհ կբացի ապստամբների համար՝ առաջ շարժվելու դեպի Հոմս՝ կենտրոնական շրջանի գլխավոր քաղաքը, որը ծառայում է որպես խաչմերուկ՝ կապելով Սիրիայի ամենաբնակեցված շրջանները:

Ապստամբների ամենահզոր խմբավորումը զինյալ սուննի իսլամիստ Հայաթ Թահրիր ալ-Շամն է (HTS), որին աջակցում է Թուրքիան, և որը նախկինում եղել է Ալ Քաիդայի մասնաճյուղը Սիրիայում: Դրա առաջնորդ Աբու Մուհամեդ ալ-Գոլանին խոստացել է պաշտպանել Սիրիայի կրոնական փոքրամասնություններին, սակայն շատերը շարունակում են վախենալ ապստամբներից:

HTS-ը և մյուս ապստամբ խմբերը փորձում են ամրապնդել իրենց իշխանությունը Հալեպում՝ այն դնելով, այսպես կոչված, Փրկության կառավարության կառավարման ներքո, որը նրանք ստեղծել են հյուսիս-արևմտյան իրենց անկլավում:

Հալեպի բնակիչները հայտնում են, որ հացի և վառելիքի պակաս կա, հեռահաղորդակցության ծառայությունները նույնպես սահմանափակվել են:

Թարգմանությունը՝ Էմմա Չոբանյանի