Բլինքենը հայտարարել է, որ ԱՄՆ-ը կարող է պատժամիջոցներ սահմանել Վրաստանի դեմ՝ բողոքի ցույցերը ճնշելու պատճառով

ԱՄՆ պետքարտուղար Էնթոնի Բլինքենը հայտարարել է, որ Վաշինգտոնը պատրաստ է պատժամիջոցներ կիրառել Վրաստանի դեմ եվրաինտեգրման կողմնակիցների նկատմամբ բռնի գործողությունների համար, որոնք արդեն մեկ շաբաթ է՝ բողոքի ցույցեր են անցկացնում ամբողջ երկրում։ Այս մասին ասվում է Պետքարտուղարության հրապարակած հայտարարության մեջ։

«Միացյալ Նահանգները խստորեն դատապարտում է «Վրացական երազանք» կուսակցության դաժան և չարդարացված բռնությունը Վրաստանի քաղաքացիների, ցուցարարների, լրատվամիջոցների ներկայացուցիչների և ընդդիմության նկատմամբ: Մենք կոչ ենք անում «Վրացական երազանքին» դադարեցնել իր ռեպրեսիվ մարտավարությունը՝ ներառյալ կամայական ձերբակալություններն ու ֆիզիկական բռնությունը, որոնք օգտագործվում են քննադատությունը ճնշելու համար»,- ասվում է Բլինքենի հայտարարության մեջ։

Ըստ պետքարտուղարի՝ «իրավապահների կողմից ցուցարարներին հասցված լուրջ վնասվածքների մասին հաղորդումներն առանձնակի մտահոգիչ են»։ Բլինքենը կոչ է արել անհապաղ ազատ արձակել բոլոր նրանց, ովքեր «կալանավորվել են խաղաղ հավաքների և խոսքի ազատության իրավունքն օգտագործելու համար» և պատասխանատվության ենթարկել «ուժի ապօրինի կիրառման» համար պատասխանատու պաշտոնյաներին:

«Միացյալ Նահանգները համերաշխ է Վրաստանի ժողովրդի և նրա դեմոկրատական նկրտումների հետ։ Նրանք, ովքեր խաթարում են Վրաստանում ժողովրդավարական գործընթացները կամ ինստիտուտները, ներառյալ՝ նրանք, ովքեր ճնշում են Վրաստանի քաղաքացիների խաղաղ հավաքներ անցկացնելու և արտահայտվելու իրավունքը, պատասխանատվության կենթարկվեն: Ի հավելումն երկկողմ համագործակցության նախապես հայտարարված համապարփակ վերանայմանը՝ Միացյալ Նահանգները պատրաստվում է օգտագործել մեր տրամադրության տակ եղած բոլոր գործիքները, այդ թվում՝ լրացուցիչ պատժամիջոցները»,- ընդգծել է ԱՄՆ պետքարտուղարը։

Ավելի վաղ Բալթյան երկրները պատժամիջոցներ էին կիրառել «Վրացական երազանք» կուսակցության հիմնադիր Բիձինա Իվանիշվիլիի և Վրաստանի ՆԳՆ ղեկավարության դեմ։ Եվրամիությունը նույնպես Թբիլիսիին սպառնացել է բողոքի ցույցերը ճնշելու համար հետևանքներով։

Թարգմանությունը՝ Տաթև Ֆռանգյանի