ՄԱԿ-ի մարդու իրավունքների հանձնակատարը կոչ է անում Վրաստանի իշխանություններին հարգել հավաքների և արտահայտվելու ազատության իրավունքը

ՄԱԿ-ի մարդու իրավունքների գերագույն հանձնակատար Վոլքեր Թյուրքը կոչ է արել Վրաստանի իշխանություններին պահպանել և հարգել խաղաղ հավաքների ու խոսքի ազատության իրավունքը, որի իրականացումը խաթարվել է օրեր շարունակվող բողոքի ցույցերի ընթացքում՝ բռնության և անհամաչափ միջոցների կիրառման պատճառով, իսկ որոշ դեպքերում՝ Թբիլիսիի քաղաքային ոստիկանության կողմից բացարձակապես անհարկի ուժի կիրառման պատճառով, գրում է Գրուզիա օնլայնը։

Նշվում է, որ կադրերում երևում է, որ ոստիկանությունը ցուցարարների և լրագրողների դեմ կիրառում է չափից ավելի ուժ, պղպեղային գազ, ջրցան մեքենաներ և քիմիական գրգռիչներ: Կան բազմաթիվ փաստագրված հաղորդումներ ձերբակալվածների նկատմամբ նվաստացնող և անմարդկային վերաբերմունքի մասին: Բացի այդ, տասնյակ լրագրողներ ենթարկվել են ոտնձգությունների և ծեծի անհայտ անձանց կողմից։

«Ցուցարարների և լրատվամիջոցների ներկայացուցիչների նկատմամբ անհարկի կամ անհամաչափ ուժի կիրառումը չափազանց մտահոգիչ է։ Բոլոր վրացիները պետք է կարողանան ազատ և խաղաղ կերպով արտահայտել իրենց տեսակետները իրենց երկրի ապագայի վերաբերյալ»,- ասել է Թյուրքը։

Գերագույն հանձնակատարը նաև կոչ է արել ցուցարարներին՝ արտահայտել իրենց տեսակետները խաղաղ ճանապարհով։

«Յուրաքանչյուր ոք, ով պատասխանատու է օրենքը խախտելու համար, պետք է պատասխանատվության ենթարկվի։ Պետք է հետաքննվեն նաև ձերբակալվածների նկատմամբ վատ վերաբերմունքի հետ կապված մեղադրանքները»,- ասել է ՄԱԿ-ի պաշտոնյան։

Թարգմանությունը՝ Տաթև Ֆռանգյանի