ԱՄՆ-ը, ԵՄ-ն և ՄԱԿ-ը Սիրիայում ապաէսկալացիայի կոչ են անում

Եվրամիությունը Սիրիայում քաղաքացիական պատերազմի նոր սրման և ապստամբների առաջխաղացման ֆոնին Հալեպից կառավարական զորքերի տեղահանման ֆոնին կոչ է արել ապաէսկալացնել իրավիճակը և պաշտպանել խաղաղ բնակիչներին, գրում է DW-ի ռուսական ծառայությունը։

«Եվրամիությունն ուշադիր հետևում է Սիրիայում իրավիճակի զարգացմանը։ Մենք կոչ ենք անում բոլոր կողմերին թուլացնել լարվածությունը և ապահովել քաղաքացիական բնակչության և ենթակառուցվածքների պաշտպանությունը, ինչպես նաև մարդասիրական օգնության անարգել մուտքը՝ միջազգային մարդասիրական իրավունքի համաձայն»,- ասված է ԵՄ դիվանագիտական ծառայության հայտարարության մեջ։

Բացի այդ, փաստաթղթում նշվում է, որ ԵՄ-ն դատապարտում է Սիրիայի նախագահ Բաշար Ասադին աջակցելու համար Ռուսաստանի օդային հարվածները խիտ բնակեցված վայրերին։

ԱՄՆ Պենտագոնի խոսնակ Փեթ Ռայդերը դեկտեմբերի 2-ին ճեպազրույցի ժամանակ նույն կերպ է արտահայտվել Սիրիայում իրավիճակի վերաբերյալ: Նրա խոսքով՝ ԱՄՆ Պաշտպանության նախարարությունն ուշադիր հետևում է Սիրիայում տեղի ունեցող իրադարձություններին, որտեղ սուննի արմատական «Հայաթ Թահրիր ալ-Շամ» ահաբեկչական խմբավորման զինյալները և Սիրիայի ազգային բանակի ստորաբաժանումները հարձակվում են կառավարական զորքերի վրա։

«Հաշվի առնելով տարածաշրջանում խաղաղ բնակչությանը և փոքրամասնությունների խմբերին վնաս հասցնելու զգալի ներուժը՝ Միացյալ Նահանգները, այլ դաշնակիցների և գործընկերների հետ միասին, ապաէսկալացիայի կոչ է անում», – ասել է Ռայդերը:

ՄԱԿ-ի հաղորդագրության համաձայն էլ՝ գլխավոր քարտուղար Անտոնիո Գուտերեշը «տագնապ է հայտնել Սիրիայի հյուսիս-արևմուտքում բռնության կտրուկ աճի կապակցությամբ՝ կոչ անելով անհապաղ դադարեցնել ռազմական գործողությունները և վերադառնալ ՄԱԿ-ի աջակցությամբ իրականացվող քաղաքական գործընթացին»:

«Բոլոր կողմերը պետք է պաշտպանեն քաղաքացիական անձանց և քաղաքացիական օբյեկտները, այդ թվում՝ ապահովելով ռազմական գործողություններից փախչող խաղաղ բնակիչների անվտանգ անցումը»,- ասել է Գուտերեշի խոսնակ Ստեֆան Դյուժարիկը:

Թարգմանությունը՝ Տաթև Ֆռանգյանի