07.10.2026 | 23:19
Հայաստանը ՄԱԿ-ում ընդգծել է զարգացող երկրների համար միջազգային աջակցության և ֆինանսավորման կարևորությունը
Վրաստանում ուժայինները ծեծի են ենթարկել և Հայաստան արտաքսել ցույցերի ժամանակ ձերբակալված ՌԴ քաղաքացու. The Insider
Քաղաքականություն
03.12.2024 | 17:26
Վրաստանում ուժայինները ծեծի են ենթարկել և Հայաստան արտաքսել ՌԴ քաղաքացու, որը ձերբակալվել է Թբիլիսիում ԵՄ-ի հետ անդամակցության բանակցությունների դադարեցման դեմ բողոքի ակցիայի ժամանակ, գրում է The Insider-ը, որին վկայակոչում է Current time-ը։
Լրատվամիջոցի տվյալներով՝ Միխայիլ անունով տղամարդն ապրել ու աշխատել է Վրաստանում։ Նա ձերբակալվել է նոյեմբերի 29-ի լույս 30-ի գիշերը Թբիլիսիում տեղի ունեցած ցույցի ժամանակ։ Նա կանգնած է եղել լրագրողների կողքին և իր սմարթֆոնով նկարահանել է տեղի ունեցողը, երբ մի քանի ոստիկան բռնել են նրան և գետնին տապալել։
Միխայիլը պատմել է, որ մեքենայի մեջ ուժայինները ծեծի են ենթարկել իրեն ու ձերբակալված մյուս ցուցարարներին։ Նա պատմել է նաև, որ ոստիկանական բաժանմունքում ոչ ոք իրեն չի բացատրել իր իրավունքներն ու հնարավորություն չի տվել զանգահարել մերձավորներին կամ փաստաբանին։ Ոստիկանության աշխատակիցներն անձնագիր են պահանջել, սակայն նրա մոտ բնօրինակը չի եղել, ինչն էլ երկրից արտաքսման պատճառ է դարձել։
Ժամանակավոր պահման վայրում Միխայիլին այցելել են պետության կողմից նշանակված փաստաբանը և Վրաստանի օմբուդսմենը, որն օգնել է նրան կապ հաստատել ընկերների հետ։ Դեկտեմբերի 1-ի լույս 2-ի գիշերը Միխայիլը տեղափոխվել է միգրացիոն ծառայություն, նույն օրը նրա տուն են եկել ոստիկանության աշխատակիցները և վերցրել անձնագիրը։ Դրանից հետո տղամարդուն նստեցրել են մեքենան և տարել Հայաստանի հետ սահման, որը հատելուց հետո վերադարձրել են նրա հեռախոսը։ Միխայիլը փորձել է վերադառնալ Վրաստան, սակայն վրաց սահմանապահները թույլ չեն տվել։
Նշենք, որ զանգվածային բողոքի ցույցերը Վրաստանում վերսկսվել են այն բանից հետո, երբ երկրի վարչապետ Իրակլի Կոբախիձեն հայտարարել է, որ Թբիլիսին մինչև 2028 թվականի վերջը հրաժարվում է ԵՄ անդամակցության բանակցություններից ու եվրոպական դրամաշնորհներից։
Թարգմանությունը՝ Էմմա Չոբանյանի
