Քաղաքականություն
03.12.2024 | 12:52
ԱՄՆ Պետքարտուղարության խոսնակ Մեթյու Միլլերը հայտարարել է, որ Վաշինգտոնը Թբիլիսիին հստակ հասկացրել է՝ մտահոգված է քայլերով, որոնք ձեռնարկվել են ԵՄ-ի հետ ավելի մեծ ինտեգրման ճանապարհից հեռանալու ուղղությամբ: Միլլերն ընդգծել է, որ ԱՄՆ-ը կանգնած է վրաց ժողովրդի կողքին, փոխանցում է Գրուզիա օնլայնը։
«Մենք այս ամբիոնից պատժամիջոցները նախապես չենք դիտարկում, բայց երբ պատժամիջոցների մասին հայտարարություններ ենք ունենում, անում ենք դա։ Ինչպես տեսաք՝ պատժամիջոցներ կիրառեցինք Վրաստանի կառավարության ներկայացուցիչների նկատմամբ, մտցրեցինք վիզային սահմանափակումներ, այլ միջոցներ ձեռնարկեցինք, կասեցրինք 95 միլիոն դոլարի վճարումը Վրաստանի կառավարությանը։ Մենք հստակ հայտարարել ենք՝ անհանգստացած ենք քայլերով, որոնք նրանք ձեռնարկել են, որպեսզի շեղվեն Եվրոպայի հետ մեծ ինտերգրման ճանապարհից»,- հայտարարել է Միլլերը։
Նշենք, որ դեկտեմբերի 1-ին ԱՄՆ-ը դադարեցրել է ռազմավարական գործընկերությունը Վրաստանի հետ։
Վրաստանի վարչապետ Իրակլի Կոբախիձեն Թբիլիսիի հետ ռազմավարական գործընկերության դադարեցման մասին ԱՄՆ-ի հայտարարությունը «ժամանակավոր երևույթ» է անվանել։ Նա մեկնաբանել է նաև ԱՄՆ-ում Վրաստանի դեսպան Դավիթ Զալկալիանիի հրաժարականը՝ նշելով, որ այդ փաստն ափսոսանքի զգացում է առաջացնում։
Թարգմանությունը՝ Տաթև Ֆռանգյանի
