Վրաստանում ցուցարարների դեմ ջրի շիթեր են կիրառվում

Թբիլիսիի Ռուսթավելիի պողոտայում եվրոպամետ ցույցը սկսվել է: Տեղում մոբիլիզացված հատուկջոկատայինները խորհրդարանի շենքի բակից ջրի շիթեր են կիրառել ցուցարարների դեմ՝ թույլ չտալով նրանց մոտենալ շենքին, փոխանցում է «Ալիք Մեդիա»-ն:

Ցույցի մասնակիցների հիմնական մասը կանգնած է Ռուսթավելի պողոտայում, համեմատաբար փոքր մասը բողոքում է շենքի մոտ՝ ջրի շիթերին մոտ։ Ցուցարարները մի քանի անգամ պիրոտեխնիկա են կիրառել հատուկջոկատայինների դեմ:

Խորհրդարանի հարևանությամբ գտնվող Չիտաձեի փողոցում ամբողջությամբ պարեկային և քրեական ոստիկանության աշխատակիցներ են:

Հինգերորդ օրն է՝ քաղաքացիները բողոքում են ԵՄ-ի հետ անդամակցության բանակցությունները դադարեցնելու իշխող «Վրացական երազանք»-ի որոշման դեմ:

Եվրոպամետ և հակակառավարական զանգվածային ցույցերը Թբիլիսիում և Վրաստանի այլ քաղաքներում սկսվել են նոյեմբերի 28-ին. այդ օրը պաշտոնապես հայտնի դարձավ, որ «Վրացական երազանք»-ը հրաժարվում է անդամակցել Եվրամիությանը։

Իրակլի Կոբախիձեի հայտարարությունից անմիջապես հետո հազարավոր քաղաքացիներ ինքնաբուխ հավաքվեցին և՛ Թբիլիսիում՝ խորհրդարանի շենքի մոտ, և՛ Վրաստանի տարբեր քաղաքներում՝ Բաթումիում, Զուգդիդիում, Քութայիսիում, Գորիում։

Կոբախիձեի հայտարարությանը հաջորդեց «Վրացական երազանք»-ի գրասենյակի մոտ ինքնաբուխ ակցիա, որը հետագայում վերածվեց բազմահազարանոց ցույցի և ցրվեց հատուկջոկատայինների ուժերով, իսկ նոյեմբերի 29-ի վաղ առավոտյան նրանք դաժանորեն հարձակվեցին Ռուսթավելիի պողոտայում մնացած սակավաթիվ ցուցարարների վրա։

Նախագահ Սալոմե Զուրաբիշվիլիի խոսքով՝ Վրաստանի ոչ լեգիտիմ իշխանությունը պատերազմ է հայտարարել սեփական ժողովրդին։ Ընդդիմության գնահատմամբ՝ կառավարությունը պաշտոնապես փոխել է երկրի արևմտյան ուղին։ ՀԿ-ները քաղաքացիներին կոչ են անում չհամակերպվել «Վրացական երազանք»-ի որոշմանը։