Ամբողջ Վրաստանում դպրոցների աշակերտներն ու բուհերի ուսանողները բողոքի ակցիաներ են անցկացնում

Թբիլիսիի և Վրաստանի մի շարք քաղաքների ուսումնական հաստատություններում ուսումնական գործընթացն ընդհատվել է՝ ի նշան բողոքի։ Մասնավորապես, ուսանողները լքել են լսարանները, իսկ դպրոցի աշակերտները՝ դասասենյակները, և բողոքի ակցիա են անցկացրել, գրում է Գրուզիա օնլայնը։

Նշվում է, որ նրանց են միանում դասախոսներն ու ուսուցիչները։ Ցուցարարները բողոքել են Վրաստանի կառավարության որոշման դեմ՝ դադարեցնելու Եվրամիության հետ բանակցային գործընթացը մինչև 2028 թվականի վերջը։

Մասնավորապես, այսօրվանից ուսումնական գործընթացն ընդհատվել է Կոմարովի անվան և Սուրբ Իլյայի անվան դպրոցներում, ուսուցիչների ու սովորողների մեծ մասը կողմ է բողոքի ցույցի մասնակիցներին։ Դեկտեմբերի 2-ից դասեր չեն ընթանում նաև Նյուտոնի անվան մասնավոր դպրոցում։

«Մեր հիմնական արժեքը մեր աշակերտների ազատությունն ու ապագան է, այդ իսկ պատճառով մենք միանում ենք իրական բողոքի բոլոր նախաձեռնություններին»,- ասվում է դպրոցների համատեղ հայտարարության մեջ։

Դասեր չեն ընթանում նաև Կանաչ դպրոցում, որի ղեկավարության հայտարարությունում ասվում է, որ ուսումնական գործընթացը ժամանակավորապես ընդհատելու որոշումը պայմանավորված է հիմնարար սկզբունքը՝ արտահայտվելու իրավունքը պաշտպանելու ցանկությամբ։

Դեկտեմբերի 2-ից ուսումնական գործընթացը դադարեցվել է նաև Գիվի Զալդաստանիշվիլիի անվան ամերիկյան՝ UG դպրոցում։ Հատկանշական է, որ լսարաններից հեռացել են նաև Վրաստանի համալսարանի ուսանողները։

Բողոքի ցույցերը շարունակվում են նաև մարզերում՝ Զուգդիդի, Քութայիսի, Փոթիի մի շարք դպրոցներում, Լանչխութի շրջանի Նիգվզիանի գյուղի, Ախալցխայի, Չոխաթաուրի դպրոցներում։ Թբիլիսիում և Բաթումում ընթանում են ուսանողների և համալսարանների ուսուցիչների համատեղ բողոքի ցույցեր։

Թարգմանությունը՝ Տաթև Ֆռանգյանի