Սիրիական բանակը որոշ հատվածներում նահանջում է առանց դիմադրության

Սիրիական բանակը հայտարարում է ապստամբների հետ բախումների հետևանքով լուրջ կորուստների մասին, հայտնում է BBC-ի ռուսական ծառայությունը։ Ըստ հաղորդումների` նրանք արդեն զավթել են սիրիական զինվորականների կողմից վերահսկվող տարածքների մի մասը և պահպանեւմ են Հալեպի տարածքի մեծ մասի նկատմամբ վերահսկողությունը։

Շաբաթ օրը հրապարակված պաշտոնական առաջին հայտարարության մեջ նշվում է, որ սիրիական բանակի տասնյակ զինվորներ զոհվել են հյուսիս-արևմուտքում տեղի ունեցած բախումների ժամանակ։

Աղբյուրների համաձայն՝ ընդդիմադիր ուժերի ճնշումն այնքան մեծ է, որ որոշ տեղերում կառավարամետ ուժերը նահանջում են առանց դիմադրության։

«Ահաբեկիչների մեծ թվաքանակն ու ճակատների բազմազանությունը ստիպեցին մեր զինված ուժերին իրականացնել վերատեղակայման գործողություններ, որոնք ուղղված են պաշտպանության գծերի ամրապնդմանը՝ հարձակումը հետ մղելու, խաղաղ բնակիչների ու զինվորների կյանքը փրկելու և հակահարձակում նախապատրաստելու համար», – ասվում է բանակի հրամանատարության հայտարարությունում։

Մարդու իրավունքների դիտարկման սիրիական կենտրոնի (SOHR) տվյալներով՝ անցյալ չորեքշաբթի սկսված հարձակումից ի վեր զոհվել է ավելի քան 300 մարդ, այդ թվում՝ 20 խաղաղ բնակիչ։

Առաջին անգամ 2016 թվականից ի վեր ռուսական ավիացիան օդից աջակցում է Բաշար Ասադի կառավարամետ զորքերին։ Ականատեսների խոսքով՝ գիշերը օդային հարվածները շարունակվել են Հալեպի որոշ շրջաններում։

Հալեպի օդանավակայանը և դեպի քաղաք տանող ճանապարհները փակ են, հայտնել է սիրիական բանակի աղբյուրը «Ռոյթերզ»-ին։

SOHR-ի տվյալներով՝ ապստամբները գրավում էին Հալեպի ամբողջական շրջաններ՝ առանց դիմադրության հանդիպելու։ Կազմակերպության ներկայացուցիչը BBC-ին ասել է, որ քաղաքային խորհրդի, ոստիկանության և անվտանգության ծառայությունների շենքերը դատարկ են։

«Այսպիսի բան երբևէ չի եղել», – նշել է SOHR-ի ներկայացուցիչը։

Սա 2016 թվականից ի վեր առաջին հարձակումն է ապստամբների կողմից սիրիական ռեժիմի վրա։ Քառամյա քաղաքացիական պատերազմի ավարտից հետո՝ 2020 թվականին, Ասադի բանակի ուժերով նրանք դուրս մղվեցին կառավարական զորքերի վերահսկողության տակ գտնվող տարածքներից։

Այդ ժամանակվանից ի վեր ապստամբները հաստատվել են Իդլիբում՝ Հալեպի մոտակայքում, և քաղաքի հյուսիսային շրջաններում՝ Թուրքիայի սահմանների մոտ։