Վրաստանը հրաժարվում է ԵՄ անդամակցության բանակցություններից և եվրոպական դրամաշնորհներից մինչև 2028 թվականը. Կոբախիձե

Վրաստանը սառեցնում է մինչև 2028 թ․ ավարտը ԵՄ-ին անդամակցելու գործընթացը։ «Այսօր մենք որոշեցինք Եվրամիության հետ բանակցություններ սկսելու հարցը օրակարգում չդնել մինչև 2028 թվականի վերջը։ Նաև մինչև 2028 թվականի վերջ մենք հրաժարվում ենք Եվրամիության կողմից ցանկացած բյուջետային դրամաշնորհից։ 2028 թվականի վերջը այն ժամանակն է, երբ Վրաստանը տնտեսական տեսակետից պատշաճ կերպով պատրաստ կլինի 2030 թվականին Եվրամիությանն անդամակցելու շուրջ բանակցություններ սկսելու համար,- ասել է Վրաստանի վարչապետ Իրակլի Կոբախիձեն «Վրացական երազանք»-ի գրասենյակում կայացած ճեպազրույցում։

Նա ասել է, որ «կտրականապես անընդունելի է Եվրամիությանն ինտեգրվելը որպես ողորմություն ներկայացնելը, որը պետք է տա Եվրամիությունը և որ Վրաստանն իր հարուստ մշակույթով և ներուժով կարող է հարստացնել Եվրոպական միությունը նույնքան, որքան Եվրամիությունը կարող է հարստացնել Վրաստանը»:

«Այս ֆոնին վրացի ժողովրդի համար կտրականապես անընդունելի է որոշ եվրոպացի քաղաքական գործիչների ու չինովնիկների փորձը՝ Վրաստան-ԵՄ հարաբերությունները ներկայացնել որպես միակողմանի իրադարձություն։ Առավել անընդունելի է այն վիրավորանքների կասկադը, որ մենք լսել ենք այս մարդկանցից այս տարիների ընթացքում»,-ասել է Կոբախիձեն` Եվրախորհրդարանին մեղադրելով Վրաստանի դեմ «շանտաժի մերկ գործիքի» վերածվելու մեջ։ Նա նշել է, որ վերջին 3 տարիների ընթացքում Եվրախորհրդարանն ընդունել է «ստերով ու վիրավորանքներով լի 5 բանաձև»:

Թարգմանությունը՝ Էմմա Չոբանյանի