23.06.2026 | 11:23
Ուկրաինական ԱԹՍ-ները կրկին հարձակվել են Ղրիմի վրա․ թիրախում են եղել նավթաբազան, նավթամթերքի տերմինալն ու նավահանգիստը
Բայդենի վարչակազմն Ուկրաինայի համար 725 միլիոն դոլարի ռազմական օգնության փաթեթ է պատրաստում
Քաղաքականություն
28.11.2024 | 15:26
ԱՄՆ նախագահ Ջո Բայդենի վարչակազմը 725 մլն դոլարի սպառազինության փաթեթ է պատրաստում Ուկրաինայի համար։ Այս մասին հայտնում է Reuters-ը՝ հղում անելով երկու աղբյուրի, փոխանցում է Meduza-ն։
Ըստ լրատվամիջոցի զրուցակցի՝ Բայդենի վարչակազմը նախատեսում է Կիևին ԱՄՆ պահեստներից տրամադրել հակատանկային տարբեր զինատեսակներ՝ ռուսական զորքերի առաջխաղացումը կասեցնելու համար, այդ թվում՝ հակահետևակային ականներ, անօդաչու սարքեր, Stinger հրթիռներ և HIMARS հրթիռային համակարգերի զինամթերք։ Փաթեթը կներառի նաև կասետային զինամթերք։
Նշվում է, որ մինչ այս ԱՄՆ-ը տասնամյակներ շարունակ ականներ չի արտահանել, և դրանց օգտագործումը վիճահարույց է խաղաղ բնակչության համար վտանգի պատճառով։ Այնուամենայնիվ, ականները, որոնք կուղարկվեն Կիևին, հագեցած են էլեկտրամատակարարման համակարգով, որը գործում է միայն կարճ ժամանակով։ Սա նշանակում է, որ ի տարբերություն հին ականների՝ դրանք հողի մեջ չեն մնա որպես մշտական սպառնալիք խաղաղ բնակչության համար։
Լրատվամիջոցի աղբյուրներից մեկն ասել է, որ օգնության փաթեթի մասին Կոնգրեսին պաշտոնական ծանուցումը կարող է հասնել դեկտեմբերի 2-ին։ Փաթեթի բովանդակությունը դեռևս կարող է փոխվել առաջիկա օրերին՝ մինչ Բայդենի կողմից այն ստորագրելը։
Թարգմանությունը՝ Էմմա Չոբանյանի
