Քոչարյանն ու մյուսները կներկայանան, թե՞ նրանց բերման կենթարկեն

Հակակոռուպցիոն դատարանում` նախագահությամբ դատավոր Սարգիս Պետրոսյանի, այսօր նշանակված է Հայաստանի երկրորդ նախագահ Ռոբերտ Քոչարյանի, ՀԱՊԿ նախկին գլխավոր քարտուղար Յուրի Խաչատուրովի, Պաշտպանության նախկին նախարար Սեյրան Օհանյանի և նախկին փոխվարչապետ Արմեն Գևորգյանի գործի քննությունը:

Նախորդ դատակակ նիստին դատավորը որոշել է բերման ենթարկել Քոչարյանին, Խաչատուրովին և Օհանյանին` պատճառաբանությամբ, որ նրանք, ծանուցված լինելով, չեն ներկայանում նիստերին: Նրանք ինքնակա՞մ կներկայանան, թե նրանց բերման կենթարկեն, պարզ կլինի րոպեներ անց:

Նշենք, որ նախորդ դատական նիստին Սեյրան Օհանյանը դատարանին հայտնել էր, որ Ազգային ժողովում ծանրաբեռնվածություն ունի:

Քոչարյանի, Օհանյանի, Խաչատուրովի պաշտպանները նախորդ դատական նիստերի ընթացքում հարց են բարձրացրել նաև, որ իրենց վստահորդները Հակակոռուպցիոն դատարանում քննվող գործով մեղադրյալ չեն և պարտավորություն չունեն դատարան ներկայանալու:

Ինչ վերաբերում է Արմեն Գևորգյանին, նա ներկայանում է նիստերին, քանի որ բացի Մարտի 1-ի իրադարձությունների վերաբերյալ դրվագից, դատարանում քննվում է նաև ենթադրյալ կաշառքի գործ, որով Արմեն Գևորգյանը մեղադրյալ է:

Հիշեցնենք, որ Վճռաբեկ դատարանը բեկանել է Քոչարյանի և մյուսների նկատմամբ սահմանադրական կարգի տապալման հոդվածը հակասահմանադրական ճանաչելուց հետո Քոչարյանի, Խաչատուրովի, Արմեն Գևորգյանի և Սեյրան Օհանյանի նկատմամբ քրեական հետապնդումը դադարեցնելու և Մարտի 1-ի գործը կարճելու որոշումը և գործն ուղարկել առաջին ատյանի դատարան` նոր քննության:

Արաքս Մամուլյան