Մրցույթ, որը չթույլատրվեց լուսաբանել․ ովքեր ընտրվեցին Երևանի քաղաքապետարանի թափուր պաշտոններում

Երևանի քաղաքապետարանի ճարտարապետության և քաղաքաշինության վարչության, առևտրի, ծառայությունների և գովազդի վարչության ու  քաղաքաշինական հատուկ ծրագրերի վարչության պետերի թափուր հաստիքներում ընտրվել են, համապատասխանաբար, Նարեկ Բարսեղյանը, Արմեն Առաքելյանը և Ալիկ Վարդազարյանը։ Factor TV-ի հարցին ի պատասխան՝ այս մասին հայտնեց քաղաքապետի մամուլի խոսնակ Հայկ Կոստանյանը։

Factor TV-ն պարզել է՝ աշխատանքային ինչ հետագիծ ունեն նորաթուխ պաշտոնյաները․ Նարեկ Բարսեղյանն աշխատել է Քաղաքաշինության կոմիտեում։ Նա Երևանի նախկին գլխավոր ճարտարապետ Տիգրան Բարսեղյանի որդին է։ Տիգրան Բարսեղյանը գլխավոր ճարտարապետ էր նշանակվել Տարոն Մարգարյանի օրոք՝ 2013 թվականին։ 

Անցյալ տարի Տիգրան Բարսեղյանի նկատմամբ պաշտոնեական անփութության մեղադրանքով քրեական հետապնդում է հարուցվել։ Քննչական կոմիտեն տեղեկացել էր, որ Մշակույթի նախարարությունից մասնագիտական եզրակացության և համաձայնության բացակայության պայմաններում շինաշխատանքների հետևանքով վտանգվել, անզգուշությամբ վնասվել և մասնակի փլուզվել է ««Հայ փոքրիկ երգիչներ» միջազգային ասոցացիա» բարեգործական հասարակական կազմակերպությանը պատկանող՝ Երևան քաղաքի Արամի 23 հասցեում գտնվող հուշարձան շենքը և քաղաքացի Մ.Ս.-ին պատկանող՝ նույն շենքում գտնվող թիվ 3 բնակարանը՝ կազմակերպությանն ու քաղաքացուն պատճառելով առանձնապես խոշոր չափերի՝ 125 մլն 467 հազար դրամի վնաս:

Առևտրի, ծառայությունների և գովազդի վարչության պետ ընտրված Արմեն Առաքելյանը քաղաքապետարանում նոր պաշտոնյա չէ․ այնտեղ աշխատելով 2022 թվականից՝ եղել է նախկինում գործող արտաքին ձևավորման և գովազդի վարչության առաջատար մասնագետ, ապա նույն վարչության պետի պաշտոնակատար, իսկ հետո նորաստեղծ առևտրի, ծառայությունների և գովազդի վարչության պետի ժամանակավոր պաշտոնակատար։ Մինչ քաղաքապետարանում աշխատանքի անցնելը՝ Առաքելյանն աշխատել է Քանաքեռավանի համայնքապետարանում։ 

Երևանի ավագանու 2023 թվականի դեկտեմբերի 26-ի նիստում ընդունվեց քաղաքապետարանի աշխատակազմի առևտրի և ծառայությունների ու արտաքին ձևավորման և գովազդի վարչությունների միավորան որոշումը։ Քաղաքապետ Տիգրան Ավինյանը պարզաբանեց, թե որոշ վարչությունների կրկնվող գործառույթներ միավորում են մեկ ընդհանուր տրամաբանության մեջ։ Միավորման արդյունքում աշխատանքը կորցնող աշխատակիցները Factor TV-ի հետ զրույցում դժգոհել էին որոշումից, քանի որ իրենց նոր աշխատանք չէր առաջարկվել։ 

Երևանում համայնքային ոստիկանություն կստեղծվի․ քաղաքապետարանում միավորվում են վարչություններ, աշխատակիցները չգիտեն՝ ինչ են անելու

Ուշագրավն այն է, որ նախկինում գործող առևտրի և ծառայությունների վարչության պետը դիմել է դատարան՝ զբաղեցրած պաշտոնից իրեն ազատելու մասին քաղաքապետի կարգադրությունն անվավեր ճանաչելու և այդ պաշտոնում վերականգնելու համար։ Դատարանը բավարարել է հայցը և անվավեր ճանաչել Տիգրան Ավինյանի կարգադրությունը և հայցվորին վերականգնել Երևանի քաղաքապետարանի աշխատակազմի առևտրի, ծառայությունների և գովազդի վարչության պետի պաշտոնում: Քաղաքապետարանն էլ վերաքննիչ բողոք է ներկայացրել։

Մրցույթում քաղաքաշինական հատուկ ծրագրերի վարչության պետ ընտրված 30-ամյա Ալիկ Վարդազարյանն էլ մինչ այս եղել է նույն վարչության ժամանակավոր պաշտոնակատար։

Ի դեպ, մրցույթի անցկացման օրը՝ նոյեմբերի 22-ին, քաղաքապետարանի լրատվության վարչությունը Factor TV-ին չթույլատրեց լուսաբանել համայնքային ծառայության թափուր պաշտոնների համալրման համար կազմակերպված մրցույթը, թեև այն պետք է հրապարակային լիներ։ Factor TV-ի լրագրողին և օպերատորին թույլ չէին տվել մուտք գործել այն սրահ, որտեղ անցկացվում էր մրցույթը։ Լրատվության վարչության պետի պաշտոնակատար  Տարոն Գևորգյանը պատճառաբանել էր, թե մրցույթը լուսաբանելու համար պետք էր 2-3 օր առաջ դիմել։ Լրագրողի դիտարկմանը, որ հանձնաժողովը մրցույթից ընդամենը մեկ օր առաջ է ձևավորվում, Տարոն Գևորգյանը շարունակել էր պնդել, որ պետք էր նախապես դիմել՝ հղում անելով մի հրամանի, որում նախապես դիմելու վերաբերյալ որևէ դրույթ առկա չէ։

Քաղաքապետարանը  չի թույլատրում լուսաբանել վարչության պետերի մրցույթը՝ խախտելով հրապարակայնության սկզբունքը

Երևանի քաղաքապետի մամուլի խոսնակ Հայկ Կոստանյանը Factor.am-ի հարցին ի պատասխան՝ ասաց, որ Արմեն Առաքելյանն ու Ալիկ Վարդազարյանը եղել են մրցույթի միակ մասնակիցները, իսկ Նարեկ Բարսեղյանի հետ մրցել է ևս մեկ հոգի։

Արփի Հակոբյան