08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Աբխազիայում նախագահական ընտրությունները կարող են տեղի ունենալ փետրվարի 15-ին
Քաղաքականություն
20.11.2024 | 11:50
Աբխազիայում արտահերթ նախագահական ընտրությունները կարող են տեղի ունենալ փետրվարի 15-ին, «ՌԻԱ Նովոստի»-ին հայտնել է երկրի Կենտրոնական ընտրական հանձնաժողովի աղբյուրը։
Նոյեմբերի 19-ին Աբխազիայի խորհրդարանն ընդունել է հանրապետության նախագահ Ասլան Բժանիայի հրաժարականը։ Խորհրդարանի նախագահ Լաշա Աշուբան հայտնել է, որ Աբխազիայի փոխնախագահ Բադրա Գունբան պետության ղեկավարի պարտականությունները կկատարի մինչև արտահերթ ընտրությունների անցկացումը։
Գործակալության աղբյուրի խոսքով՝ խորհրդակցությունների ընթացքում ժամկետը կարող է փոխվել։
«Ընտրությունների օրվա մասին որոշումը կայացնում է խորհրդարանը»,- հավելել է նա։
Հիշեցնենք, որ Ռուսաստանի հետ ներդրումային համաձայնագրի կնքման պատճառով բողոքի ցույցերից հետո Աբխազիայում իշխանության և ընդդիմության բանակցությունների արդյունքներով նախագահ Ասլան Բժանիան հայտարարել է հրաժարականի մասին՝ «երկրում կայունությունն ու սահմանադրական կարգը պահպանելու համար»։ Ձեռք բերված պայմանավորվածության համաձայն՝ ընդդիմությունն այժմ պետք է ազատի անցած շաբաթվա բողոքի ցույցերի արդյունքում գրավված բոլոր կառավարական շենքերը։ Հրաժարականի մասին հայտարարել է նաև չճանաչված հանրապետության վարչապետ Ալեքսանդր Անկվաբը։
Թարգմանությունը՝ Տաթև Ֆռանգյանի
