30.04.2026 | 22:58
«Նուբարաշեն-Արին-Բերդ» ջրատարի վթարման հետևանքով Երևանի և Արարատի մարզի մի շարք հասցեներում 21 ժամ ջուր չի լինի
Էրդողանը ռուս-ուկրաինական պատերազմը սառեցնելու ծրագիր է պատրաստել․ Bloomberg
Քաղաքականություն
18.11.2024 | 13:17
Թուրքիայի նախագահ Ռեջեփ Թայիփ Էրդողանը պատրաստվում է նոյեմբերի 18-ին Ռիո դե Ժանեյրոյում G20-ի ղեկավարների հանդիպմանը ներկայացնել ռուս-ուկրաինական պատերազմը ներկա պայմաններում սառեցնելու իր առաջարկը: Այս մասին հայտնում է Bloomberg-ը՝ հղում անելով իր աղբյուրներին։
Լրատվամիջոցը նշում է, որ Ուկրաինայի դաշնակիցները նախագահ Վլադիմիր Զելենսկիին դրդում են դիտարկել ՌԴ նախագահ Վլադիմիր Պուտինին բանակցությունների սեղան բերելու ուղիներ, քանի որ նրանք ձգտում են դադարեցնել մարտերը: Եվրոպացի երկու պաշտոնյաներ ասել են, որ ավելանում է այն գիտակցումը, որ Զելենսկին պետք է փոխզիջման գնա Պուտինի հետ, քանի որ պարզ դարձավ, որ կողմերից ոչ մեկը չի կարող ապահովել վճռական հաղթանակ:
Աղբյուրների համաձայն՝ Էրդողանը կառաջարկի, որ Զելենսկին համաձայնի հետաձգել ՆԱՏՕ-ին անդամակցելու քննարկումները առնվազն 10 տարով՝ որպես զիջում Պուտինին։ Թուրքական առաջարկը նախատեսում է ապառազմականացված գոտու ստեղծում Ուկրաինայի արևելյան Դոնբասի շրջանում, որտեղ Ռուսաստանը 2014 թվականից վերահսկում է մեծ տարածքներ: Էրդողանը կառաջարկի այնտեղ միջազգային զորքեր տեղակայել որպես լրացուցիչ երաշխիք և Ուկրաինային ապահովել ռազմական մատակարարումներով՝ փոխհատուցելու ՆԱՏՕ-ից դուրս մնալու համաձայնությունը:
Թուրք պաշտոնյաները լրատվամիջոցին ասել են, թե հասկանում են, որ Ուկրաինայի համար դժվար կլինի ընդունել նման առաջարկը, սակայն կարծում են, որ դա ամենաիրատեսական մոտեցումն է։ Նրանք մտադիր են հետաձգել օկուպացված տարածքների երկարաժամկետ ճակատագրի քննարկումը, որպեսզի կենտրոնանան նախ կայուն հրադադարի ապահովման ուղղությամբ։
Ըստ աղբյուրների՝ Էրդողանը հուսով է, որ կարող է համոզել Զելենսկիին մասնակցել Ստամբուլում խաղաղության բանակցություններին, քանի որ նա տեսել է հետախուզական տվյալներ, որոնք ցույց են տալիս, որ Ուկրաինան կարող է ավելի շատ տարածքներ կորցնել առաջիկա մի քանի ամիսների ընթացքում, եթե մարտերը չդադարեն։ Սակայն ռազմի դաշտում հեռանկարները նաև Պուտինին մղում են շարունակելու պայքարը:
Թարգմանությունը՝ Էմմա Չոբանյանի
