Թրամփը Ռոբերտ Քենեդի կրտսերին առաջադրել է առողջապահության նախարարի պաշտոնում

ԱՄՆ նորընտիր նախագահ Դոնալդ Թրամփը հայտարարել է Ռոբերտ Քենեդի կրտսերի թեկնածությունն Առողջապահության և մարդկային ծառայությունների դեպարտամենտի ղեկավարի պաշտոնում առաջադրելու մասին, գրում է Current time-ը։

«Բոլոր ամերիկացիների անվտանգությունն ու առողջությունը ցանկացած վարչակազմի ամենաբարձր առաջնահերթությունն է, և Առողջապահության ու մարդկային ծառայությունների վարչությունը հսկայական դեր կխաղա՝ մարդկանց պաշտպանելու վնասակար քիմիական նյութերից, աղտոտող նյութերից, թունաքիմիկատներից, դեղագործական միջոցներից և սննդային հավելումներից, որոնք ստեղծել են մեր երկրում առողջության լուրջ ճգնաժամ»,- գրել է Դոնալդ Թրամփը իր Truth Social հարթակում։

Քենեդին սենատոր Ռոբերտ Քենեդիի որդին է և 60 տարի առաջ սպանված ԱՄՆ նախագահ Ջոն Քենեդու եղբորորդին։ Նա 2024 թվականի նախագահական մրցապայքարին մասնակցում էր որպես անկախ թեկնածու, սակայն օգոստոսին դուրս մնաց ընտրապայքարից և հայտարարեց Թրամփին պաշտպանելու մասին: Քենեդի կրտսերը քննադատության է ենթարկվել իր հակապատվաստանյութային դիրքորոշման համար և մեղադրվել COVID-19-ի ժամանակ պատվաստանյութերի անվտանգության և արդյունավետության մասին դավադրության տեսություններ տարածելու մեջ:

Հավելենք, որ դեռևս նախագահի անկախ թեկնածու լինելու ընթացքում քարոզարշավի ժամանակ նա հայտարարել էր, որ իր վարչակազմը կաջակցի Հայաստանին և Արցախին։

2023 թվականի դեկտեմբերին X-ի միկրոբլոգում հրապարակված տեսաուղերձում Քենեդին հայտարարել էր, որ ևս «մեկ պատերազմ կանխելու և ազատության ու ժողովրդավարության սկզբունքները պաշտպանելու համար ԱՄՆ կառավարությունը պետք է մոբիլիզացնի տարածաշրջանային աջակցությունը հայերի ինքնապաշտպանության և ինքնորոշման իրավունքին և պաշտպանի արցախահայության անվտանգ վերադարձը իրենց պատմական հայրենիք»։ Նա նշել էր, որ Ադրբեջանը հարձակման է անցել և տեղահանել ամբողջ 120 հազար հայ բնակչությանը։

Այս տարի ապրիլին էլ նա սոցցանցում գրառմամբ հարգանքի տուրք էր մատուցել Հայոց ցեղասպանության զոհերի հիշատակին և հայտարարել, որ «պետք է գործել հիմա՝ Ադրբեջանին պատասխանատվության ենթարկելու համար՝ կոչ անելով ազատ արձակել պատանդներին և կիրառել պատժամիջոցներ՝ մինչև բնիկ հայերի Արցախ վերադարձի ապահով ու կենսունակ ճանապարհին հասնելը»։

Հիշեցնենք, որ ավելի վաղ Թրամփը հայտարարել էր 2017 թվականին Արցախ այցելած Թուլսի Գաբարդին ազգային հետախուզության տնօրենի պաշտոնում նշանակելու մասին։

Էմմա Չոբանյան