«Ազատ մտածելու, կարծիք հայտնելու իրավունք չունե՞նք»․ Բակո Սահակյանի հետ կպայքարի ընդդիմադիր պատգամավորը

Արցախում հուլիսի 19-ից 29-ը սպասվում են նախագահական ընտրություններ։ Մինչ սահմանված վերջին օրը՝ հուլիսի 12-ը, առաջադրված միայն մեկ թեկնածու կար՝ գործող նախագահ Բակո Սահակյանը, սակայն այսօր հայտնի դարձավ, որ ընդդիմադիր «Շարժում-88» խմբակցությունը առաջադրել է խմբակցության ղեկավար Էդուարդ Աղաբեկյանին։ Factor.am-ի հարցին, թե ո՞րն է իր ակնկալիքը, որ առաջադրվել է, ընդդիմադիր պատգամավորը զարմացած պատասխանեց. «Որ չորս հոգի ենք,ուրեմն չպիտի՞ առաջադրվենք»։

Հիշեցնենք, որ Արցախի խորհրդարանում ընդդիմադիր խմբակցություններն են «Շարժում-88»-ը և «Վերածնունդը», որոնց կազմում ներառված է ընդամենը 4 պատգամավոր։ «Ազատ մտածելու, կարծիք հայտնելու իրավունք չունե՞նք։ Վերջին տարիներին, որ բարձրաձայնում ենք ախտերի, սխալների մասին, սրանով ևս մեկ անգամ անդրադառանում ենք այդ մտահոգություններին»,-ասաց նա։

Դիտարկմանը, որ օրեր առաջ մեզ հետ զրույցում «Վերածնունդ» խմբակցության ղեկավար Հայկ Խանումյանն ասել էր, թե իմաստ չունի առաջադրվել, քանի որ երկու խմբակցությունները միասին չորս պատգամավոր ունեն, Էդուարդ Աղաբեկյանն արձագանքեց․ «Նախ ասեմ, որ քանակը չի կարևոր, երկրորդ՝ Հայկի կարծիքն ինձ համար վերջնական չէ, հետո տարիքային ցենզով ինքն իրավունք էլ չունի առաջադրվելու»։ Մեր հարցին, թե ո՞րն է պատճառը, որ մյուս խմբակցությունները սատարում են գործող նախագահ Բակո Սահակյանի թեկնածությունը, Աղաբեկյանը պատասխանեց, թե իրավասու է խոսել միայն իրենց խմբակցության որոշման մասին․ «Ես պատասխան եմ տալիս մեր խմբակցության կայացրած որոշումների համար»,- եզրափակեց Արցախի նախագահի թեկնածուն։

Սեդա Ղուկասյան