Քաղաքականություն
08.11.2024 | 12:56
Սպիտակ տուն վերադառնալուց հետո Դոնալդ Թրամփը կարող է ուժեղացնել պատժամիջոցային ճնշումն Իրանի վրա, այդ թվում՝ փորձելով կրճատել երկրի նավթային եկամուտները, գրում է The Wall Street Journal-ը՝ հղում անելով իր աղբյուրներին։
Պարբերականի զրուցակիցներից մեկը, որը Սպիտակ տանը պաշտոն է զբաղեցրել, ասել է, որ Թրամփը խոստացել է «դիվանագիտորեն մեկուսացնել Իրանին և տնտեսապես թուլացնել», որպեսզի երկիրը չկարողանա շարունակել ֆինանսավորել ՀԱՄԱՍ-ին, Հըզբոլլահին, ինչպես նաև Եմենի հութիներին և Իրաքում ու Սիրիայում շիա խմբավորումներին։
Թրամփին մոտ կանգնած աղբյուրներն ասում են, որ նոր վարչակազմն արագ կգործի՝ փորձելով սահմանափակել Իրանի նավթային եկամուտները: Մասնավորապես, նախատեսվում է պայքարել իրանական նավթ տեղափոխող ու վաճառող առևտրականների և նավահանգիստների դեմ։
WSJ-ի տվյալներով՝ իր առաջին նախագահական ժամկետում Դոնալդ Թրամփն Իրանի վրա առավելագույն ճնշման ռազմավարություն է ներկայացրել՝ հուսալով, որ Թեհրանը կհրաժարվի միջուկային զենքի մշակումից և կդադարեցնի ֆինանսավորել այն խմբերին, որոնց ԱՄՆ-ը համարում է ահաբեկիչներ։
Թարգմանությունը՝ Տաթև Ֆռանգյանի
